ސަރުކާރު ހިންގާ ޕީއެންސީގެ ޕާޓީގެ ކުލައިން ރާއްޖެއަށް ގެނުވީ ބަލިމަޑުކަމާއި ހައި ހޫނުކަންކަމަށް ރައީސް އަބްދުﷲ ޔާމީން އަބްދުލްގައްޔޫމް ވިދާޅުވެއްޖެއެވެ.

ރައީސް ޔާމީން މިފަދައިން ވިދާޅުވީ "ވޭކް އަޕް" ގެ ނަމުގައި ޕީއެންއެފް އިން ފުރަތަމަ ފަހަރަށް ބޭއްވި ގައުމީ ބޮޑު އެއްވުމުގެ ޖަލްސާގައި ވާހަކަފުޅުދައްކަވަމުންްނެވެ.

އެމަނިކުފާނު ވަނީ ޅެން ބައިތަކުން ޕީއެންސީގެ ވެރިކަމުގައި ރައްޔިތުން ތަހައްމަލު ކުރަމުންދާ ގޮތް ސިފަކޮށްދެއްވާފައެވެ.

ޕީޕީއެމްގެ ވެެރިކަމަކީ ބަހާރު މޫސުންކަމަށް ސިފަކުރައްވާ ރައީސް ޔާމީން ވަނީ އަދުގެ ހާލަތު އޮތްގޮތް ރައްޔިތުންނަށް ވަރަށް ބޮޑަށް ސާފުކަމަށް ވިދާޅުވެފައެވެ.

އެގޮތުން، އޭރު ދިވެހިން ނަލަ ފިނިފެންމަލާއި އަސުރުމާ ކުލައިގެ ޖާދޫ ދެކެފައިވާ ކަމަށް ވެސް އެ މަނިކުފާނު ވިދާޅުވި އެވެ.

އޭރު ލިބުނު ފޮނިކަން ބަޔަކަށް ކަމުނުދިޔަކަމަށް ފާހަގަކުރައްވާ އެމަނިކުފާނު ވިދާޅުވީ އެ ވެރިކަމުގައި ބަޅިނދާއި ކޮކާތައް ފޮނިބޯން އައި ކަމަށެވެ. އެމަނިކުފާނު މިފަދައިން ވިދާޅުވީ އެ ވެރިކަމުގައި މަންފާ ހޯދަން ބައެއް އުޅުނު ކަަމަށް ފާހަގަކުރައްވަ އެވެ. އެއަށް ފަހު ދެން އައީ ފަނޑު ނޫކުލައިގެ ވެރިކަމެއް ކަމަށް ރައީސް ޔާމީން ވިދާޅުވި އެވެ.

އެމަނިކުފާނު އިތުރަށް ވިދާޅުވީ ދިވެހިރާއްޖޭގައި މިހާރު ޝަކުވާގެ އިތުރުން ދެން އުފުލާނެ އެއްޗެއް ނެތްކަމަށެވެ.

އަނދިރި ދައުލަތެއްގެ ފަރާތުން މިހާރު ހިންގަމުންދާ ބޭއިންސާފުގެ ނަތީޖާއަކަށް ވެގެން ދަނީ ދިވެހިރައްޔިތުން ފުނޑިގެން ދިޔުންކަމަށް ވެސް ރައީސް ޔާމީން ފާހަގަކުރެއްވިއެވެ.

ވެރިންގެ ޖީބުތައް ފަލަވެގެންދަނީ ރިޝްވަތުގެ ފައިސާއިންކަމަށް ވިދާޅުވެ އެމަނިކުފާނު ވަނީ ސަރުކާރަށް ވަރަށް ބޮޑަށް ފާޑުވިދާޅުވެފައެވެ.