ނޫސްވެރިން އަނިޔާވެރިކޮށް މަރާލަން ގޮވާލި ޕީއެންސީގެ ޕީޖީ ލީޑަރު އިބްރާހިމު ފަލާހު މައާފަށް އެދެން އިލްތިމާސްކޮށްފިއެވެ.

ނޫސްވެރިންގެ ބެލެނިވެރި ޖަމްއިއްޔާއެއް ކަމަށްވާ މޯލްޑީވްސް ޖާނަލިސްޓު އެސޯސިއޭޝަނުން ވަނީ ފަލާހު ނޫސްވެރިން "އުލު" ބައިންދަން ގޮވާލުމުން އެކަން ކުށްވެރިކޮށް ބަޔާނެއް ނެރެފައެވެ.

އެމްޖޭއޭގެ ބަޔާނުގައި ބުނެފައިވަނީ މީޑިޔާ ކޮންޓްރޯލުކުރާ ބިލަށް ތާއީދުކޮށް ބަހުސްކުރަމުން ނޫސްވެރިން އަނިޔާވެރިކޮށް މަރާލާން ފަލާހު ގޮވާލުމަކީ ނޫސްވެރިންނާ މީޑިޔާތަކަށް ބިރު ދައްކައި އިންޒާރުދީ އެމީހުންގެ މައްޗަށް އަނިޔާވެރިވުމަށް ހިތްވަރުދީ ދެއްކި ވާހަކަތަކެއް ކަމަށް އެ ޖަމްއިއްޔާއިން ދެކޭ ކަމަށެވެ. އަދި އެވާހަކަތައް އެންމެ ހަރުކަށި އިބާރާތުން ކުށްވެރިކުރާ ކަމަށްވެސް އެ ބަޔާނުގައި ބުނެފައިވެއެވެ.

މަޖިލީހުގެ ތަޅުމުގައި ފާޅުކަން ބޮޑު ގޮތެއްގައި ބައެއްގެ މައްޗަށް އަނިޔާވެރިވުމަށް ގޮވާލާފައިވާތީ، ވެރިކަން ކުރާ ޕީއެންސީއިން އޭނާއާ މެދު އަޚުލާގީ ފިޔަވަޅު އެޅުމަށް ގޮވާލާ އެމްޖޭއޭއިން ވަނީ އާންމުކޮށް އެނގޭނެހެން އެ ވާހަކަތަކާ މެދު ފަލާހު މައާފަށް އެދުމަށް އިލްތިމާސްވެސް ކޮށްފައެވެ.

ފަލާހު ވަނީ ނޫސްވެރިން ޖެހެނީ "އުލު" (އަނިޔާވެރި ގޮތަކަށް މަރާލަން) ކަމަށް ބުނެ މަޖިލީހުގެ ތަޅުމުގައި ޓެރަރިޒަމްއަށް ހިތްވަރުދޭ ފަދަ ވާހަކަތެއް ދައްކަވާފައެވެ.