އިންޑިއާ ސިފައިންގެ ބަދަލުގައި ހެލިކޮޕްޓަރު ދުއްވަން ހަމަޖެއްސި އެ ގައުމުގެ މަދަނީ މީހުން ކަމަށް ދައުވާ ކުރާ މީހުން ހޯމަ ދުވަހުގެ ހަވީރު ރާއްޖެ އަތުވެއްޖެ ކަމަށް ޑިފެންސް މިނިސްޓްރީން ބުނެފި އެވެ.

އެ މިނިސްޓްރީން އެހެން ބުނެފައިވަނީ ނެރުނު ބަޔާނެއްގައެވެ.

ސ. ގަމުގައި އޮޕަރޭޓު ކުރާ ހެލިކޮޕްޓަރު ދުއްވަން ގެނައީ ކިތައް މީހުން ކަމެއް ސަރުކާރުން ހާމަކޮށްފައިނުވެއެވެ.

ނަމަވެސް އެމީހުން އައްޑޫއަށް ގޮސް ހެލިކޮޕްޓަރު ހޭންޑް އޯވާ ކުރުމުގެ މަސައްކަތް ކުރާނެ ކަމަށް ޑިފެންސް މިނިސްޓްރީން ވަނީ ބަޔާނުގައި ބުނެފައެވެ.

ރާއްޖޭގައި ދުއްވާ ދެ ހެލިކޮޕްޓަރާއި ޑޯނިއާ ފްލައިޓު ދުއްވަން ގާއިމުވެ ތިބޭ 89 ސިފައިން ރާއްޖެއިން ފޮނުވާލަން އެއްބަސްވުމުން އެ ތަކެތި ދުއްވާނެ މަދަނީ މީހުން ވަނީ ހަމަޖައްސާފައެވެ.