ދިވެހި ރައްޔިތުންނަށް ނޭގި، ރައްޔިތުންގެ ތެރެއިން އެތަކެއްހާސް ބަޔެއް ވެރިކަން ކުރާ ޕީއެންސީއަށް ހޯމް މިނިސްޓަރުގެ ދަށުން ވައްދާ، ދައުލަތުން އެ ބޭބޭފުޅުން ފައިސާ ނެންގެވުމުން އެކަން އެއީ މަނީލޯންޑްރިންގ ކުށަކަށް ނުވޭތޯ ރައީސް އަބްދުﷲ ޔާމީން އަބްދުލްގައްޔޫމް ސުވާލު ކުރައްވައިފިއެވެ.

ޕީއެންއެފްގެ ޓައުން ހޯލް ޖަލްސާގައި ވާހަކަފުޅުދައްކަވަމުން އެމަނިކުފާނު ވަނީ މި ސަރުކާރުން ޑީއެންއާރް ނަހަމަ ގޮތުގައި ބޭނުންކޮށްގެން ޕީއެންސީއަށް މެންބަރުން އިތުރުކުރުމަށް ސަރުކަރުން ހިންގި ބޮޑު ކޮރަޕްޝަނަށް ފާޑުވިދާޅުވެފައެވެ.

މަނީ ލޯންޑްރިންގ މިހާރު ވަރަށް ރަނގަޅު ކަނދުފައްޗަކަށްވެއްޖެ ކަމަށާއި ސަރުކާރުން މިހާރު ކުރަމުން އަންނަނީ މިފަދަ ކަންކަން ކަމަށް އެމަނިކުފާނުގެ ވާހަކައިގެ ތެރެއިން ވަނީ ފާހަގަކުރައްވާފައެވެ.

މީގެ އިތުރުން، ރާއްޖޭގެ މައި ތަހުގީގީ އިދާރާކަމަށްވަ ދިވެހި ފުލުހުންގެ ޚިދުމަތުން އިންސާފުވެރިކަމާއި ގާނޫނާއި ގަވާއިދުގެ މަތިން މައްސަލަތައް ބަލާ، ނުހައްގުން މީހުން ފްރޭމް ކުރުމުގެ އަމަލުތައް ހުއްޓާލާ އެ ޚިދުމަތުގެ ފެންވަރު ރަނގަޅުކުރުމަށް ރައީސް ޔާމީން ވަނީ މިހާރުގެ ކޮމިޝަނަރ އޮފް ޕޮލިސް އިސްމާއީލް ނަވީނަށް ގޮވާލާފައެވެ.

ދިވެހިރާއްޖޭގެ ގާނޫނުގައި "ޕަޕަރާޒީ" އާއި ބެހޭ ބިލެއް އަންނަން ޖެހޭ ކަމަށް ފާހަގަކުރައްވާ ރައީސް ޔާމީން ވިދާޅުވީ އެއްވެސް މީހެއްގެ ހުއްދަ ނެތި އެމީހެއްގެ ފޮޓޯ ނަގާ ބޭނުން ނުކުރެވޭނެ ކަމަށެވެ.

ދެ މީހެއް ވާހަކަ ދައްކަން ތިބޭ މަންޒަރު ފޮޓޯ ނަގައިގެން އިންޓެލިޖެންސް ރިޕޯޓް ތައްޔާރުކޮށް އެފަދަ މީހުންނަށް ކެޓްލޮގް ތައްޔާރުކޮށް ވާނުވާ ބަންދު ޖަހަމުން މި ސަރުކާރުން އަންނަ ކަމަށް ރައީސް ޔާމީންގެ ވާހަކަގައި ސިފަކުރެއްވިއެވެ.