ދިވެހި ސަރުކާރަށް ލިބޭނެ ކަމަށް ލަފާކޮށް ބަޖެޓުގައި ޖެހި ހިލޭ އެހީގެ ބޮޑު އިން ސައްތައެއް ނުލިބޭކަން ހާމަވެއްޖެއެވެ.
މި އަހަރު ނިމެން ބާކީ ހަތަރު މަސް އޮތްއިރު ހިލޭ އެހީއަށް ލިބޭނެކަމަށް ބަޖެޓުގައި ޖެހި އަދަދުގެ 92 އިންސައްތަ އަދި ނުލިބޭކަން ހާމަވެފައިވަނީ މި މަހުގެ ހަތަރުވަނަ ދުވަހާ ހަމައަށް ހިނގި ޚަރަދާއި އާމްދަނީގެ ތަފުސީލުތައް ފިނޭންސް މިނިސްޓްރީން ހާމަކޮށް ނެރުނު ހިސާބުތަކުންނެވެ.
އެގޮތުން އެ ރިޕޯޓުން އެނގޭ ގޮތުގައި އަހަރު ނިމެން ބާކީ ހަތަރު މަހަށް ވީއިރު ވެސް ހިލޭ އެހީގެ ގޮތުގައި ލިބުނީ އެންމެ 203.1 މިލިއަން ރުފިޔާއެވެ. މިދިޔަ އަހަރު ވެސް މި މުއްދަތުގައި ލިބުނީ އެންމެ 372.4 މިލިއަން ރުފިޔާއެވެ. އެހެންވެ، މިދިޔަ އަހަރަށްވުރެ ވެސް 170 މިލިއަނެއްހާ ރުފިޔާ ހިލޭ އެހީން ދަށްވެއްޖެއެވެ.
ބަޖެޓުކުރި އަދަދަށް ބަލާއިރު ހިލޭ އެހީގެ ގޮތުގައި އަދި ލިބުނީ އެންމެ އަށް އިންސައްތައެވެ. ބަޖެޓުކުރި އަދަދުގެ 92 އިންސައްތަ އަދިވެސް ނުލިބެއެވެ.
ބޮޑެތި ކްރެޑިޓް ރޭޓިން އެޖެންސީތަކުން ވަނީ ރާއްޖެއަށް ދަރަނި ނުދެއްކިދާނެކަމުގެ ބިރު ބޮޑުކަމަށް ނިންމާ 'ޖަންކް' ރޭޓިންއެއް ދީފައެވެ. އެހެންވެ، ހިލޭ އެހީއާއި ލޯނު ހޯދަން ވެސް ވަނީ ވަރަށް ބޮޑަށް ދަތިވެފައެވެ.
ޖުމުލަގޮތެއްގައި ބަލާއިރު އަހަރުގެ މިހާތަނަށް ޚަރަދުކުރީ 25.4 ބިލިއަން ރުފިޔާއެވެ. އެއީ، މި އަހަރު އާމްދަނީގެ ގޮތުގައި ލިބުނު 26.3 ބިލިއަން ރުފިޔާއަށް ވުރެ 868.7 މިލިއަން ދަށް އަދަދެކެވެ. އެހެންވެ، ޚަރަދު ކުރަނީ ލިބޭ އެއްޗަކުންނޭ ސަރުކާރުން އަންނަނީ ބުނަމުންނެވެ.
އެކަމަކު، ސަޕްލަޔަރުންނަށް ދޭންޖެހޭ އެތައް ބިލިއަން ރުފިޔާއެއް ނުދީ އެބައޮތެވެ. އެ އަދަދުތަކުގެ ތަފުސީލު ވެސް ސަރުކާރުން ހާމައެއް ނުކުރެއެވެ. އެހެންވެ، ފާޑުކިޔުން ވަނީ ބޮޑުވެފައެވެ.
