ދައުލަތުގެ ބަޖެޓުން މުސާރަ އާއި އިނާޔަތްތަކަށް ކުރި ހަރަދު 575 މިލިއަނުން އިތުރުވެފައިވާކަން ހާމަވެއްޖެއެވެ.
ދައުލަތުގެ ބަޖެޓުން މި އަހަރުގެ މިހާތަނަށް މުސާރައާއި އިނާޔަތްތަކަށް އަދި ޕެންޝަނަށް ކުރި ހަރަދު އެތައް ސަތޭކަ މިލިއަނުން އިތުރުވެފައިވާކަން ހާމަވެފައިވަނީ ފިނޭންސް މިނިސްޓްރީން މިއަދު އާންމުކުރި މާލީ ހިސާބުތަކުންނެވެ.
އާންމުކޮށްފައިވާ މި މަހުގެ ހަތަރަކާއި ހަމައަށް ދައުލަތުން ކުރި ހަރަދުތަކާއި ލިބުނު އާމްދަނީގެ ހިސާބުތައް އާންމުކޮށްފައިވާއިރު، އެހި ސާބުތަކުން ދައްކާ ގޮތުގައި ސެޕްޓެމްބަރު 4، އާއި ހަމައަށް މުސާރައާއި އިނާޔަތްތަކަށް އަދި ޕެންޝަނަށް ކުރި ހަރަދު ކުރީ ޖުމްލަ 9.5 ބިލިއަން ރުފިޔާ އެވެ. މިއީ މިދިޔަ އަހަރުގެ މި މުއްދަތާ އަޅާބަލާއިރު 575.4 މިލިއަން ރުފިޔާއިން އިތުރުވެފައެވެ.
މި ހިސާބުތަކުން ދައްކާ ގޮތުގައި، މި އަހަރު މުސާރައަށް ހަރަދުކުރީ 4.3 ބިލިއަން ރުފިޔާއެވެ. މިއީ މިދިޔަ އަހަރަށް ވުރެ 300 މިލިއަން ރުފިޔާ އިތުރު އަދަދެކެވެ.
މީގެ އިތުރުން އިނާޔަތްތަކަށް މި އަހަރު 3.8 ބިލިއަން ރުފިޔާ ޚަރަދުކުރިއިރު މިއީ މިދިޔަ އަހަރަށް ވުރެ 200 މިލިއަން ރުފިޔާ އިތުރު އަދަދެކެވެ. އަދި 65 އަހަރު ފުރުމުން ދޭ އިނާޔަތް ހިމެނޭހެން ޕެންޝަނަށް މި އަހަރަ ހަރަދުކުރީ 1.4 ބިލިއަން ރުފިޔާއެވެ.
