އެމްޑީޕީއިން އޮކްޓޯބަރު މަހުގެ 3 ވަނަ ދުވަހު ބާއްވާ އެއްވުމުގެ ބެނަރތައް މާލެ ސިޓީ ކައުންސިލުން މޭޔަރ އާދަމް އާޒިމް މާލޭގައި ނެތީސް ނެގުމުން އެމަނިކުފާނު ނުރުހުން އަމާޒުކުރައްވައިފިއެވެ.
އާޒިމް އެކްސްގައި ކުރެއްވި ޕޯސްޓެއްގައި ވިދާޅުވެފައިވަނީ، އެމްޑީޕީގެ ބެނާތައް ނެގިކަން އެނގިވަޑައިގަތީ ރާއްޖެއިން ބޭރުގައި ހުންނަވަނިކޮށް ކަމަށެވެ.
އާޒިމް ދެކެވަޑައިގަންނަވާ ގޮތުގައި އެމްޑީޕީ ހިމެނޭހެން ހުރިހާ ސިޔާސީ ޕާޓީތަކަށް ވެސް ސިޔާސީ ހަރަކާތް ހިންގަން ހުރަސްއަޅައިގެން ނުވާނެއެވެ.
އެމްޑީޕީގެ ބެނަރތައް ކެނޑި މައްސަލައިގައި އާޒިމްގެ ނުރުހުން އަމާޒުކުރައްވާ ވިދާޅުވެފައިވަނީ، އޮންނަ އުސޫލުގެ ތެރެއިން ބެނާތައް ހަރުކުރެވެން ޖެހޭނެ ކަމަށާއި އަލުން ބެނާތައް ހަރުކުރުމުގައި އޭނާ ވެސް ބައިވެރިވެވަޑައިގަންނަވާނެ ކަމަށް މޭޔަރު ވިދާޅުވި އެވެ.
މީގެ އިތުރުން، ރާއްޖެ ހަމަ މަގަށް އަޅުވަން އެމްޑީޕީން ބާއްވާ ބޮޑު އެއްވުމުގައި ވެސް އޭނާ ބައިވެރިވެވަޑައިގަންނަވާނެ ކަމަށް ވެސް އާޒިމް ވިދާޅުވެފައިވެއެއެވެ.
މޭޔަރ އާޒިމް މާލޭގައި ނެތީސް، އެ ބެނަރތައް ނެގީ މާލޭގެ ޑެޕިއުޓީ މޭޔަރު މުހައްމަދު އަރީޝްގެ އެންގެވުމަށް ކަމަށްވެއެވެ. މުވައްޒަފުން ލައްވައި އެ ބެނާތައް ނެގީ އެ ކައުންސިލްގެ ރޯޑް މެނޭޖްމަންޓް ޑިޕާޓްމަންޓްގެ ހެޑް ޝަމްހޫޒާ އަހްމަދެވެ.
ޝަމްހޫޒާއަކީ ރައީސް މުހައްމަދު މުއިއްޒުގެ އަރިސް ބޭފުޅެކެވެ. އަދި އޭނާ އަކީ އެމްޑަބްލިޔުއެސްސީގެ ޗެއާޕާސަން ވެސް މެއެވެ. އެ މަގާމަށް އޭނާ އައްޔަންކުރީ ރައީސް މުއިއްޒުގެ އެންގެވުމަށެވެ.
