ސަންގުޓީވީއިން ސިލްސިލާކޮށް ކުރިޔަށްގެންދާ މާލެސިޓީ މޭޔަރުންގެ ބަހުސްގައި ބުދަ ދުވަހުގެ ރޭ ވާހަކަފުޅުދައްކަވަމުން، ރައީސް އަބްދުﷲ ޔާމީން އަބްދުލް ގައްޔޫމްގެ ތާއީދާއި އެކު، މާލޭ ސިޓީގެ މޭޔަރުކަމަށް ކުރިމަތިލައްވާ، ކުރީގެ ކޮމިޝަނާ އޮފް ޕޮލިސް ހުސެއިން ވަހީދް ވިދާޅުވީ، ސިޔާސީ ޕާޓީ އަކުން ކޮންމެ ނިންމުމެއް ނިންމިޔަސް ޒަމީރު ގަބޫލު ނުކުރާ ކަމެއް ނުކުރައްވާނެ ކަމަށެވެ.

ވަކި ސިޔާސީ ޕާޓީއަކުން ނުވަތަ ވަކި ސިޔާސީ ފިކުރަކުން ރާއްޖޭގައި ސިޔާސީ ޕާޓީތައް އުފެދިފައި ހުރީ މައިގަނޑު ދެ ފިކުރެއްގެ މައްޗަށް ބިނާކޮށްފައި ކަމަށާއި، އެއީ ބިނާކުރަނިވި ފިކުރާއި ފަނާކުރަނިވި ފިކުރުކަމަށް ހުސެއިން ފާހަގަކުރެއްވިއެވެ.

ހުސެއިން ވިދާޅުވީ ޕަބްލިކު އޮފީހަކަށް ނިކުންނަ ކޮންމެ މީހަކީ އެމީހާ އެއްކޮށް ސިޔާސީ ޕެކޭޖެއް ހިފައިގެން އަންނަ މީހަކަށް ނުވުން އެއީ އެމީހެއްގެ ކިބައިގައި ހުންނަން ޖެހޭނެ ޝަރުތެއް ކަމަށެވެ.

އަދި ހަމަ އެގޮތަށް އެމީހާ އަދާކުރަން ޖެހޭ ޒިންމާއާއި މަސްއޫލިއްޔަތުތައް އަދާކުރަމުން ދާއިރު އެހެން ކަމަކާއި ދޭތެރޭ އެމީހަކު ވިސްނަންނުޖެހޭ ވަރުގެ މީހަކަށްވުން އެއީ ވަރަށް މުހިއްމުކަމެއްކަމަށްވެސް ހުސެއިން ވިދާޅުވިއެވެ.

މާލޭގެ މޭޔަރު ކަމަށް ނިކުންނަވާއިރު ޕާޓީއަށްވުރެ ގައުމާއި ރައްޔިތުން އިސްކުރުމުގެ މުހިއްމުކަމަށްވެސް ހުސެއިން ވަނީ އަލިއަޅުވާލާފައިއެވެ.