ސަންގުޓީވީއިން ސިލްސިލާކޮށް ކުރިޔަށްގެންދާ މާލެސިޓީ މޭޔަރުންގެ ބަހުސްގައި ބުދަ ދުވަހުގެ ރޭ ވާހަކަފުޅުދައްކަވަމުން، ރައީސް އަބްދުﷲ ޔާމީން އަބްދުލް ގައްޔޫމްގެ ތާއީދާއި އެކު، މާލޭ ސިޓީގެ މޭޔަރުކަމަށް ކުރިމަތިލައްވާ، ކުރީގެ ކޮމިޝަނާ އޮފް ޕޮލިސް ހުސެއިން ވަހީދް، މި ސަރުކާރުގެ ތާއީދާއި އެކު މޭޔަރުކަމަށް ކުރިމަތިލައްވާ އާޒިމާ ޝުކޫރަށް ރައްދު ދެއްވާ ވިދާޅުވީ، ކޮންމެ މީހަކުގެ ވެސް އަޚުލާގެއް އޮންނަންވާނެ، މަގާމަކަށް ކުރިމަތި ލާއިރު ދަރަންޏެއް އޮވެގެން ނުވާނެ ކަމަށެވެ.

ސިޔާސީ ފިކުރު ކަށަވަރު ނުވާ މީހުން މަގާމުތަކަށް ކުރިމަތިލާ، ރިޔާސީ އިންތިޚާބެއް ފެށެން އެއް މަހަށް ވެފައިވަނިކޮށް މުޅިން އެހެން ފިކުރެއް ގެންގުޅުއްވުމަށް ފަހު، ރިޔާސީ އިންތިޚާބު ކާމިޔާބުވުމުން މުޅިން އެހެން ފިކުރެއް ގެންގުޅުއްވި ބޭފުޅުން މާދަމާ ދެން ދާނީ ކޮން ފިކުރަކާ އެއްކޮޅަށް ކަމެއް ނޭނގޭކަމަށް ހުސެއިން ވިދާޅުވިއެވެ.

ހުސެއިން ވިދާޅުވީ މީހާ ގަބޫލުކުރަން ޖެހޭ، އުސޫލެއް، ހަމައެއް އޮންނަންވާނެ ކަމަށެވެ.

އަދި ބޭލީސްހުރެ އެމަނިކުފާނު މަސައްކަތްކުރަމުން އައި ވަކި ގޮތަކަށްކަމަށާއި، ސިޔާސީ ވިސްނުމެއް ސިކުނޑި ތެރޭގައި ހުރެގެންކަމަށްވެސް ހުސެއިން ވިދާޅުވިއެވެ.

އިތުރުން، އެ ފިކުރުގެ މަތީގައި ދެމި ހުންނާނެކަމަށްވެސް ހުސެއިން ވަނީ ޔަގީންކަން ދެއްވާފައިއެވެ.