ފިތުރު އީދު ދުވަހުގެ ހަވީރު މާލޭގައި ވެހިކަލް ދުއްވުން ސިޓީ ކައުންސިލުން މަނާކޮށްފިއެވެ.

ވެހިކަލް ދުއްވުން މަނާ ކޮށްފައިވަނީ އެ ދުވަހުގެ ހަވީރު ދެ ގަޑިއަރަށެވެ. އެގޮތުން ހަވީރު 4 އިން 6 އަށް މާލޭގައި އެ ދުވަހު ވެހިކަލް ދުއްވުމަކީ މަނާކަމެއް ކަމަށް ވަނީ ކަނޑައަޅާފައެވެ.

އީދު ދުވަހު ހިނގާފައި އުޅެވޭ ވަގުތުތަކެެއް ކަނޑައަޅައި ދިނުމަށް ބަހާ ތަރިކަ މިނިސްޓްރީން އެދިފައިވުމުން ސިޓި ކައުންސިލްގެ ބުރާސްފަތި ދުވަހުގެ ބައްދަލުވުމުގައި ކަނޑައަޅާފައި ވަނީ އީދު ދުވަހުގެ ހަވީރު 4-6 އަށް ވެހިކަލް ދުއްވުން މަނާ ވަގުތުގެ ގޮތުގައި ހަމަޖެއްސުމަށެވެ.

ކައުންސިލް ބައްދަލްވުމުގައި ފުރަތަމަ ހުށައެޅި ގޮތް ނިންމީ ވެހިކަލް މަނާ ހަތަރު ގަޑިއިރު ހަމަޖެެއްސުމަށެވެ. އެއީ ހަވީރު ހަތަރަކުން ރޭގަނޑު އަށަކަށެވެ. ނަމަވެސް އެ ހުށައެޅުން ފާސް ނުވި އެވެ.

މި ގޮތަށް ނިންމާފައިވަނީ އީދު ދުވަހު ހަވީރު މާލޭގެ މަގުތަކުގައި ކުޅިވަރުގެ ގިނަ ހަރަކާތްތަކެއް އޮތުމުން އެކަމަށް ފުރުސަތު ފަހިކޮށް އަދި އާންމުންނަށް އެ ހަރަކާތްތައް ބަލާލެވޭނެ ފަހި ގޮތްތަކެއް ހަމަޖައްސައި ދިނުމަށެވެ.