ދަރަނި އިންތިހާއަށް އިތުރުވެފައިވަނިކޮށް އަނެއްކާވެސް ދަރަނި ނަގަން ސަރުކާރުން ތައްޔާރުވެއްޖެއެވެ.

ސަރުކާރުން ހާމަކޮށްފައިވާ ގޮތުގައި ދަރަނި ނަގަން ނިންމާފައިވަނީ ސަރުކާރުގެ ޚަރަދުތައް ހަަމަޖެއްސުމަށެވެ. އެގޮތުން ނިމި ދިޔަ ހަފްތާގެ އަންގާރަ ދުވަހު މިނިސްޓްރީ އޮފް ފިނޭންސުން، ސަރުކާރުގެ ހަރަދުތައް ހަމަޖެއްސުމަށް ދަރަންޏަށް 550 މިލިއަން ޑޮލަރު (8.5 ބިލިއަން ރުފިޔާ) ދޭނޭ ބަޔަކު ހޯދަން ވަނި އިއުލާންކޮށްފައެވެ.

އެ އިއުލާންގައިި ބުނެފައިވާ ގޮތުގައި، އެ ދަރަނި ސަރުކާރަށް ދޭނޭ މާލީ އެޖެންސީއެއް ހޯދަން އިއުލާން ކުރީ މި އަހަރު ބަޖެޓަށް ފައިސާ ހޯދަން ރާވާފައިވާ ސިޔާސަތުގެ ދަށުން ކަމަށެވެ. އެގޮތުން އެ ސިޔާސަތުގެ ތެރޭގައި ހިމެނެނީ، ފައިސާ ހޯދަނީ ލޯނެއް ނުވަތަ ޓީބީލެއްގެ ގޮތުގައި ކަމާއި ސަރުކާރަށް ދަރަނި ދޭނޭ ބަޔަކު ހޯދަން އިއުލާން ކުރީ ސަރުކާރުން ދަރަނި ނަގާ އުސޫލުތައް މިހާރަށް ވުރެ ދެ ފުށް ފެންނަ ގޮތެއްގައި ކުރިއަށް ގެންދަންކަމާއި އަދި މުޅި އަހަރު ތެރޭ ލިބޭ ޕްރޮޕޯސަލްތައް ހާއްސަ ކޮމިޓީއަކުން އިވެލުއޭޓް ކުރާގޮތަށެވެ. އެގޮތުން ނަގާ ދަރަނީގެ މައުލޫމާތު އާންމު ކުރާނޭ ކަމަށް ވެސް މިނިސްޓްރީއިން ވަނީ ހާމަކޮށްފައެވެ.

ދަރަނި ބޭނުން ކުރާނީ މަސްވެރިކަމާއި ސިއްހީ ދާއިރާ އަދި އުމްރާނީ ތަރައްގީގެ ދާއިރާގައި ސަރުކާރުން އިސްކަން ދޭ ތަރައްގީގެ މަޝްރޫއުތައް ހިންގުމަށް ކަމަށް އެ އިއުލާނުގައި ބުނެފައިވެއެވެ.

ސަރުކާރުން މި ވަރުގެ ބޮޑު ދަރަންޏެއް ނަގަން އިއުލާންކޮށްފައިވާއިރު، މި އަހަރަށް ފާސްކުރި ބަޖެޓުޓާއެކު ހަރަދުތައް ހަމަޖެއްސުމަށް ސަރުކާރަށް މި އަހަރު 16.3 ބިލިއަން ރުފިޔާ ބޭނުންވެއެވެ.

އެހެންކަމުން ދަރަނި އިންތިހާއަށް އިތުރުވެފައިވަނިކޮށް އަނެއްކާވެސް ދަރަނި ނަގައިގެން ޚަރަދުތައް ހަމަޖެއްސުމަށް ސަރުކާރުން މަސައްކަތްކުރަން ފެށުމުން ފާޑުކިޔުން ވަނީ އަމާޒުވެފައެވެ.