ސަރުކާރުގެ ޚަރަދުތައް މަދުކޮށް ރިކަރަންޓު ޚަރަދުވެސް ކުޑަ ކުރުމަށް ފިނޭންސުން އަންގާފައިވަނިކޮށް އެކަމަށް ބެލުމެއް ނެތި އަނެއްކާވެސް ޑެޕިއުޓީ މިނިސްޓަރަކު އައްޔަންކޮށްފިއެވެ.

ޗެނަލް13އަށް މައުލޫމާތު ލިބިފައިވާ ގޮތުގައި މިފަހަރު ހަމަ ޖައްސާފައިވަނީ ހެލްތު މިނިސްޓްރީގެ ނައިބަކަށް ނ.ހޮޅުދޫ ބުލޫރެސްޓު އަހުމަދު ހަމްދާން ނާސިރެވެ.

ހަމްދާނަކީ ނިމިދިޔަ މަޖިލިސް އިންތިހާބުގެ ޕީއެންސީ ޕްރައިމަރީގައި ހޮޅުދޫ ދާއިރާއަށް ވާދަކޮށް ނާކާމިޔާބުވީ މީހެކެވެ. އެގޮތުން އޭރު ހަމްދާން ތުހުމަތުކުރި ގޮތުގައި ރައީސް މުހައްމަދު މުއިއްޒު އޭނާއާ ދެކޮޅަށް ކެންޑިޑޭޓަކު ނެރުނީއެވެ. ރައީސް އަބްދުﷲ ޔާމީނަށް އިހުލާސްތެރި މީހެއްކަމަށް ހަމްދާން ޝައްކުކުރެވޭތީއެވެ. މި ވާހަކަތައް ހަމްދާން އެ ބައެއްގެ ކައިރީގައި ދެއްކި ބައެއް މީހުންއަތުގައި ރެކޯޑިންވެސް އެބަހުރި ކަމަށް ޗެނަލް13އަށް މައުލޫމާތު ލިބިފައިވެއެވެ.

ހަމްދާން މަޖިލިސް ޕްރައިމަރީއިން ބަލިވުމުން އޭނާއަށް މަގާމެއް ހޯދައިދޭން އެންމެ ބުރަކޮށް އުޅުއްވީ ހަމްދާންއާ އެކު ޕީޕީއެމްގައި މަސައްކަތްކުރި އެ ޕާޓީގެ ކުރީގެ ސެކެރެޓަރީ ޖެނެރަލް އަދި މިހާރު ސްޕޯޓްސް ކޮމިޝަނަރ މުހައްމަދު ތޮލާލްކަމަށްވެސް މައުލޫމާތު ލިބިފައިވެއެވެ.

ހަމްދާނަށް މަގާމު ހަމަޖެއްސީ ވަރަށް ސިއްރުން ވަރަށް ވަންހަނާކޮށްގެން ކަމަށްވެސް ރައީސް އޮފީހުން ޗެނަލް13އަށް މައުލޫމާތު ދިން އޮފިޝަލް ނަން ހާމަނުކުރުމަށް އެދިވަނީ ކިޔައިދީފައެވެ. އަދި މިކަމާ ގުޅިގެން މެޑަމް ސާޖިދާ ވަނީ ހިތްޕުޅާ ނުވެފައިކަމަށާ އެއީ ހަމްދާނަކީ ސާޖިދާ އިތުބާރުކުރާ މީހަކަށް ނުވުމުން ކަމަށްވެސް މައުލޫމާތު ލިބިފައިވެއެވެ.

ހަމްދާނަކީ މިހާރުވެސް ޕީޕީއެމްގެ ރަޖިސްޓްރާއެވެ. ހަމްދާން ވަނީ ދުވަސްކޮޅަކު ސިޔާސީ މައިދާނާ ދުރުގައި ހުރުމަށްފަހު މިހާރު ވަރަސް އެކްޓިވްވެފައިކަން ފާހަގަކޮށްލެވެއެވެ. އެގޮތުން މިހާރު ޕީއެންސީ މީޑިޔާ ގްރޫޕުވެސް ހިންގަނީ އޭނާއެވެ.

މި ސަރުކާރުގެ ސިޔާސީ މަގާމުތައް ގިނަވެ މަތިބަރުުވުމުގެ ސަބަބުން ޚަރަދުތައް އާމްދަނީއާ ނުބައްދަލުކަމަށް ފިނޭންސް މިނިސްޓްރީއިން ހާމަކޮށްފައިވެއެވެ.