ސަރުކާރުގެ އާމްދަނީއަށްވުރެ ހަރަދުތައް ބޮޑުކަން ހާމަވެއްޖެއެވެ.

ފިނޭންސް މިނިސްޓްރީއިން އާންމުކުރާ ތަފާސް ހިސާބުތައް ދައްކާ ގޮތުގައި މާރޗު މަހުގެ 21 ވަނަ ދުވަހުގެ ނިޔަލަށް ކޮށްފައިވާ ހަރަދުތައް އާމްދަނީ އާ ނުބައްދަލެވެ.

އެގޮތުން ފިނޭންސްގެ ވީކްލީ ފިސްކަލް ސްޓެޓިސްޓިކްސް ރިޕޯޓުތަކުން ހާމަވާ ގޮތުގައި، މާރޗު މަހުގެ 21 ވަނަ ދުވަހުގެ ނިޔަލަށް ލިބިފައިވާ ޖުމްލަ އާމްދަނީ އަކީ 7.88 ބިލިއަނާއި ގާތްކުރާ އަދަދެއްކަމަށް ހާމަކޮށްފައިވާއިރު، 21 މާރޗު ނިޔަލަށް ކޮށްފައިވާ ޖުމުލަ ހަރަދުތައް 8.94 ބިލިއަނަށް އަރާކަމަށް ފިނޭންސް މިނިސްޓްރީއިން ހިއްސާކޮށްފައިވެއެވެ.

6.57 ބިލިއަނަކީ ޓެކްސް ފައިސާގެ ގޮތުގައި ލިބިފައިވާ އާމްދަނީކަމަށާއި ބާކީ އަކީ ހިލޭ އެހީ އަދި އެހެނިހެން ގޮތް ގޮތުން ލިބިފައިވާ ފައިސާކަމަށް ވާއިރު އަދި ޖުމްލަ ހޭދައިގެ ތެރެއިން 6.88 ބިލިއަނަކީ ރިކަރެންޓު ހަރަދުތަކެވެ. އަދި ކެޕިޓަލް ހަރަދުތައް 2.05 ބިލިއަނަށް އަރާކަމަށްވެސް ތަފާސް ހިސާބުތަކުން ދައްކައެވެ.

މި އަހަރުގެ މިހާތަނަށް ލިބިފައިވާ ޖުމްލަ އާމްދަނީ މިދިޔަ އަހަރާއި އަޅާ ބަލާއިރު އިތުރުކަން ފާހަގަކުރެވެއެވެ. މިދިޔަ އަހަރުގެ މާޗު 21 ވަނަ ދުވަހުގެ ލިބިފައިވަނީ 7.75 ބިލިއަން ރުފިޔާއެވެ. އަދި މިދިޔަ އަހަރުގެ މި މުއްދަތަކަށް ކޮށްފައިވާ ޖުމްލަ ހަރަދަށްވުރެ މި އަހަރު މި މުއްދަތުގެ ތެރޭގައި ކޮށްފައިވާ ހަރަދުތައް ކުޑަކަންވެސް ފާހަގަކުރެވެއެވެ. 2023 ވަނަ އަހަރުގެ މި މުއްދަތުގެ ނިޔަލަށް ސަރުކާރުން ހަރަދުކުރީ 10.39 ބިލިއަނާއި ގާތްކުރާ އަދަދެކެވެ.

މި އަހަރުގެ މިހާތަނަށް ޕިއެސްއައިޕީ މަޝްރޫއުތަކަށް ކޮށްފައިވާ ހަރަދުތައް މިދިޔަ އަހަރުގެ މި މުއްދަތުގައިކޮށްފައިވާ ހަރަދުތަކަށްވުރެ ކުޑަކަންވެސް ތަފާސް ހިސާބުތަކުން ދައްކައެވެ. މިދިޔަ އަހަރުގެ ތެރޭގައި މި މުއްދަތުގައި ހަރަދުކުރީ 2.88 ބިލިއަންކަމަށްވާއިރު މި އަހަރު ހަރަދުކުރީ 1.13 ބިލިއަނެވެ.