ކޮންމެ ހަފްތާއަކު ގަވާއިދުން ޝާއިއުކުރާ ފިސްކަލް ޑިވެލޮޕްމަންޓު ރިޕޯޓު އާންމު ނުކުރާތާ ތިން ހަފްތާއަށް ވުރެ ގިނަ ދުވަސްވެއްޖެއެވެ.

ދައުލަތަށް ލިބޭ އާމްދަނީ އާއި ކުރާ ހަރަދުތަކުގެ ތަފްސީލުތައް ހިމެނޭ ފިސްކަލް ރިޕޯޓް އެންމެ ފަހުން އާންމުކޮށްފައި ވަނީ މާޗް މަހުގެ 26 ގައެވެ.

އެ ރިޕޯޓްގައި މާޒް 21 އާ ހަމަޔަށް ދައުލަތުގެ މާލީ ހިސާބުތައް ހުރި އިރު އެޔަށްފަހު އަންގާރަ ދުވަހަށް 26 ދުވަސް ވަނީ ވެފައެވެ.

މަޖިލިސް އިންތިޚާބާ ދިމާކޮށް ގިނަ މަޝްރޫޢުތައް އިއުލާން ކުރަމުން ސޮއި ކުރަމުން ސަރުކާރުން ދާއިރު އެކަންކަމާ ގުޅޭ މައުލޫމާތުވެސް ސަރުކާރުން ހާމަނުކުރާތީ ގިނަ ބަޔަކު އަންނަނީ ފާޑުކިޔަމުންނެވެ.

އެންމެފަހުން ރިޕޯޓު ނިޔަލަށް އާމްދަނީ އަށް 7.8 ބިލިއަން ރުފިޔާ ލިބުނުއިރު ހަރަދުކުރީ 8.9 ބިލިއަން ރުފިޔާކަން ހާމަވެއެވެ.

ކެޕިޓަލް ހަރަދުތަކަށް ބަލާއިރު އުމްރާނީ ތަރައްގީއަށް ނުވަތަ އިންފްރާސްޓްރަކްޗާ އެސެޓްސްތަކަށް ހަރަދުކުރުން މަޑުޖެހިފައިވާ ކަމަށް އަދަދުތަކުން ދައްކަ އެވެ.

މިދިޔަ އަހަރުގެ މި މުއްދަތުގައި 2.8 ބިލިއަން ރުފިޔާ ހަރަދުކުރި ނަމަވެސް މި އަހަރު ހަރަދުކުރީ 1.5 ބިލިއަން އެވެ.