ގިނަ ބަދަލުތަކާ އެކު ކުރިއަށް ދިޔަ މިއަހަރުގެ ދިރާސީ އަހަރު ނިންމާ ދަރިވަރުންނާއި ޓީޗަރުންނަށް ސްކޫލްތައް ބަންދުވެ، މަސް ދުވަހަށް ވުރެ ބޮޑު ޗުއްޓީއަކަށް ހިނގައްޖެއެވެ.

ރާއްޖޭގެ 216 ސްކޫލެއްގައި މިއަދު ދަރިވަރުންނަށް ރިޕޯޓް ފޮތް ދީ ޗުއްޓީ ފަށާފައި ވާއިރު ދެން އަލުން ކިޔެވުން ފެށޭނީ އަންނަ މަހު 26 ގައެވެ.

އަންނަ މަހު ފަށާ ދިރާސީ އަހަރުގެ ފުރަތަމަ ޓާމް ނިމޭނީ މި އަހަރުގެ ސެޕްޓެމްބަރު 26 ގައެވެ.

މި އަންނަ އޮކްޓޯބަރު ހައެއްގައި ދެވަނަ ޓާމުގެ ކިޔެވުން ފެށުމަށް ހަމަޖެހިފައިވާއިރު، އެ ޓާމުގެ ކިޔެވުން ނިމޭނީ އަންނަ އަހަރުގެ އޭޕްރިލް ހައެއްގައެވެ. ނަމަވެސް މުދައްރިސުން އޭޕްރީލް ތިނެއްގައި ނިކުންނަންޖެހޭ ކަމަށް ކަލަންޑަރުގައި ވެއެވެ.

މުޅި ރާއްޖޭގައި މި އަހަރު ޕްރީސްކޫލުން ފެށިގެން ގްރޭޑް 12 އާ ހަމައަށް 84،200 ދަރިވަރުން ތައުލީމު ހާސިލްކޮށްފައިވެ އެވެ. އެ ދަރިވަރުންނަށް ކިޔަވައިދިނުމުގައި ދިވެހި 6،516 ޓީޗަރުންނާއި 1،843 ބިދޭސީ ޓީޗަރުން މަސައްކަތް ކުރިއެވެ.

މިހާރު ގެނެސްފައިވާ ބަދަލާއެކު 2025 ވަނަ އަހަރުގެ ކިޔެވުން ފެށޭނީ އޭޕްރިލް ހަ ވަނަ ދުވަހެވެ.

އަންނަ އަހަރުގެ ރޯދަ މަސް ފެބްރުއަރީ 28ގައި ފެށޭއިރު، ސްކޫލް ބޮޑު ޗުއްޓީ ދެން ލިބޭނީ ރޯދަ މަހުގައި ކަމަށް އާ އެކަޑަމިކް ކަލަންޑަރުން ދައްކައެވެ.