ރާއްޖޭގެ މާލީ ހާލަތު ދެނެގަތުމަށް ފިނޭންސް މިނިސްޓަރް ޑރ. މުހައްމަދު ޝަފީގު ރައްޔިތުންގެ މަޖިލީހުގެ މާލިއްޔަތު ކޮމިޓީއަށް ހާޒިރުކުރުމަށް ފާސްކޮށްފިއެވެ.

މާލިއްޔަތު ކޮމިޓީން މިނިސްޓާރ ހާޒިރުކުރަން ފާސްކުރީ މިއަދު ކުރިޔަށް ދިޔަ އެ ކޮމިޓީގެ ބައްދަލުވުމުގައެވެ.

މާލީ ހާލަތު ދެނެގަތުމަށް ވަޒީރު ހާޒިރުކުރަން ހުށަހެޅުއްވީ، މަޖިލީހުގެ ނައިބު ރައީސް އަދި ދިއްގަރު ދާއިރާގެ މެމްބަރު އަހުމަދު ނާޒިމެވެ.

އެ ހުށަހެޅުމަށް ކޮމިޓީގެ ބައްދަލުވުމުގައި ބައިވެރިވި ހުރިހާ މެމްބަރުން ތާއީދުކުރައްވާ ހުރިހާ މެމްބަރުންގެ އިއްތިފާގުން ވަނީ ފާސްކޮށްފައެވެ.

ނާޒިމް ވިދާޅުވީ ހާލަތު ދެނެގަނެވުމުން މަޖިލީހުން މާލީ ގޮތުން އަޅަން ޖެހޭ ފިޔަވަޅުތައް އެނގޭނެ ކަމަށާއި އެ މަސައްކަތް ލަސްކުރާނެ ވަގުތެއް ނެތް ކަމަށެވެ.

ސަރުކާރުން އަންނަނީ ފަށާފައިވާ މަޝްރޫއުތައް ހުއްޓާލަމުންގެންދާ ސަބަބަކީ "މާލީ ހާލަތު ގޯސްވުން" ކަމަށް ބުނެފައެވެ.

އެގޮތުން ބަޖެޓް ނެތަސް ކުރިޔަށް ގެންދެވޭނެ މަޝްރޫޢުއެއް ކަމަށްވާ "ރަސްމާލެ" މަޝްރޫއުވެސް ވަނީ ބަޖެޓް ތަން ނުދޭކަމަށް ބުނެ މެދުކަނޑާލާފައެވެ.