ރާއްޖޭގެ މާލީ ހާލަތު ދެނެގަތުމަށް، ފިނޭންސް މިނިސްޓަރު ޑރ. ޑރ. މުހައްމަދު ޝަފީގު ރައްޔިތުންގެ މަޖިލީހުގެ މާލިއްޔަތު ކޮމިޓީއަށް ހާޒިރުކުރަން، އެ ކޮމިޓީއިން ފާސްކޮށްފިއެވެ.
އަންގާރަ ދުވަހު އޮތް ކޮމިޓީގެ ބައްދަލުވުމުގައި މާލީ ހާލަތު ދެނެގަތުމަށް ވަޒީރު ހާޒިރުކުރަން ހުށަހެޅުއްވީ، ވެރިކަންކުރާ ޕީއެންސީއަށް ނިސްބަތްވާ، މަޖިލީހުގެ ނައިބު ރައީސް ދިއްގަރު ދާއިރާގެ މެންބަރު އަހުމަދު ނާޒިމްއެވެ.
އެ ހުށަހެޅުމަށް ކޮމިޓީގެ ބައްދަލުވުމުގައި ބައިވެރިވި ހުރިހާ މެންބަރުން ތާއީދުކުރެއްވިއިރު، އެގޮތަށް ފާސްވީ މެންބަރުންގެ އިއްތިފާގުންނެވެ.
"މިހާރު މާލީ ހާލަތު އޮތް ގޮތް ވަރަށް ރަނގަޅަށް ދެނެގަނެ ސާފުކުރަން،ޖެހޭ ކަމަށާ އެހެންކަމުން އެންމެ ފުރަތަމަ ކަމަކަށް ކޮމިޓީގެ ހުރިހާ މެންބަރުންވެސް ތިއްބަވައިގެން ކޮމިޓީއަށް ތެދު ސައްހަ މައުލޫމާތު ދެއްވުމަށް ފިނޭންސް މިނިސްޓަރަށް ދަންނަވަން ކޮމިޓީގައި ނާޒިމް ވިދާޅުވެފައިވެއެވެ.
މިފަދައިން ހާލަތު ދެނެގަނެވުމުން، މަޖިލީހުން މާލީ ގޮތުން އަޅަން ޖެހޭ ފިޔަވަޅުތައް އެނގޭނެ ކަމަށާއި އެ މަސައްކަތް ލަސްކުރާނެ ވަގުތެއް ނެތް ކަމަށްވެސް އޭނާ ވިދާޅުވި އވެ.
މި ހުށަހެޅުއްވުމަށް ޕީއެންސީގެ ހުރިހާ މެންބަރުންގެ އިތުރުން ކޮމިޓީގައި ހިމެނިވަޑައިގަންނަވާ، އެމްޑީޕީއަށް ނިސްބަތްވާ ހަނިމާދޫ ދާއިރާގެ މެންބަރު އަބްދުލްގަފޫރު މޫސާގެ އިތުރުން ހުޅުމާލެ ދެކުނު ދާއިރާގެ މެންބަރު އަހުމަދު ޝަމްހީދު ވެސް ތާއީދުކުރެއްވިއެވެ.
