ރާއްޖޭގެ ގާނޫނީ ނިޒާމު، ރޯމާ ދުވާލު، ވެރިކަން ކުރާ ޕާޓީއިން ގެންދަނީ ނަހަމަ ގޮތުގައި ބޭނުން ކުރަމުން ކަމަށް ރާއްޖޭގެ ކުރީގެ ނައިބު ރައީސް އަދި މަޝްހޫރު ގާނޫނީ ވަކީލު ޑރ. މުހައްމަދު ޖަމީލު އަހުމަދު ވިދާޅުވެއްޖެއެވެ.

ޑރ. ޖަމީލު މިފަދައިން ވިދާޅުވީ އެކްސްގައި ކުރެއްވި ޕޯސްޓެއްގައެވެ.

ކުރީގެ ރައްޔިތުންގެ މަޖިލިސް މެމްބަރު، އަދި މިހާރު އެ މަޖިލީހުގެ ޗީފް އޮފް ބިއުރޯ، އަހުމަދު ނިހާނު ހުސެއިން މަނިކުގެ މައްޗަށް އެމްއެމްޕީއާރުސިގެ ޚިޔާނާތުގެ މައްސަލައިގެ ތެރެއިން ދައުލަތުން އުފުލާފައިވާ ހުރިހާ ދައުވާތަކެއް އަނބުރާ ގެންދަން ވަނީ ނިންމާފައިކަމަށް ހާމަވެފައިވެއެވެ. އަދި އެ ދައުވާތައް އަނބުރާ ގެންދަން ނިންމީ ރައީސް އަބްދުﷲ ޔާމީންގެ މައްޗަށް ގއ ވޮޑެމުލާ މައްސަލައިގައި ދަށު ކޯޓުން ކުރި ހުކުމުގެ އިސްތިއުނާފުގެ މައްސަލާގައި 2021 ވަނަ އަހަރު ސުޕްރީމް ކޯޓުން ކުރި ހުކުމަށް ރިއާޔަތްކޮށް ބެލިއިރު، ނިހާންގެ މައްޗަށް އެ ދައުވާ ސާބިތުވާނެ ކަމަށް ނުބެލެވޭތީ ކަމަށް ބުނެ ކަމަށް ވެއެވެ.

މި ޚަބަރުގެ ލިންކާ އެކު ޑރ. ޖަމީލު ކުރެއްވި ޕޯސްޓުގައި ވަނީ ގިނަ ސުވާލުތަކެއް ޕީޖީއަށް އަމާޒުކުރައްވާފައެވެ. ޑރ. ޖަމީލަކީ ރައީސް ޔާމީންގެ އިސް ގާނޫނީ ވަކީލުކަމުުގައި އެމަނިކުފާނު ވަނީ އެކަމާ ނުހަނު ކަންބޮޑުވުން ފާޅުކުރައްވާފައެވެ.

އެގޮތުން ޑރ. ޖަމީލު ވަނީ، 2021 ވަނަ އަހަރު ސުޕްރީމް ކޯޓްގެ އެ ޙުކުމް އެހެން އޮއްވާ އެއިގެ ފަހުން ވ. އާރަށުގެ މައްސަލައިގެ ދައުވާ ރައީސް ޔާމީނުގެ މައްޗަށް އުފުލީ ކީއްވެތޯ އައްސަވާ ޕީޖީއަށް ސުވާލު އަމާޒުކުރައްވާފައެވެ. އަދި ރައީސް ޔާމީނުގެ މައްސަލަތައް އަނބުރާ ނުގެން ދެވެންވީ ކީއްވެތޯ ވެސް އައްސަވާ ޑރ. ޖަމީލުވަނީ ވ.އާރަށު މައްސަލަ އަދިވެސް އޮތީ އަލުން ބަލަން އެންގި ގޮތަށް ކަމަށްވެސް ފާހަގަކުރައްވާފައެވެ.

މީގެ އިތުރުން ރައީސް ޔާމީންގެ މައްސަލައިގައި މަރު ދޮގު ގާޟީ އަހުމަދު ޝަކީލު ހަދާފައިވާކަމަށް ހައިކޯޓުން ބުނީެފަިއވާއިރުވެސް އެދައުވާ އަނބުރާ ނުގެންދެވިގެން އުޅެނީ ކީއްވެ ކަމާ މެދު ޑރ. ޖަމީލު ވަނީ ޕީޖީ އަށް އަމާޒުކުރެއްވި ސުވާލުތަކުގެ ތެރޭގައި ހިމަނުއްވާފައެވެ.

އެހެންކަމުން އެހުރިހާ ކަމެއް އެހެން ހުރުމުން ދޭހަވެގެން ދަނީ ނިހާނުގެ ދައުވާ އަނބުރާ ގެންދިޔައީ މިސަރުކާގެ ނުފޫޒުންކަމާ މިއީ ރޯމާ ދުވާލު ގާނޫނީ ނިޒާމު ޕީއެންސީން ނަހަމަ ގޮތުގައި ބޭނުން ކުރުންކަމަށް ޑރ. ޖަމީލު ސިފަކުރައްވާފައިވެއެވެ.