ސިޔާސީ މަގާމްތަކުގައި ތިއްބަވާ ފަރާތްތަކަށް ބޮޑު މުސާރަ ދޭނެ ފައިސާ ދައުލަތުގައި ހުންނަ އިރު މަސްވެރިން ބާނާ މަހަށް ދޭނެ ފައިސާ ނެތުމުން ގިނަ ބަޔަކު ޝަކުވާކުރަން ފަށައިފިއެވެ.

މި ސަރުކާރު ވެރިކަމަށް އައީ މަސްކިރާތާ ލަސްވެގެން 48 ގަޑިއިރުގެ ތެރޭގައި މަސްވެރިންނަށް ފައިސާ ދޭނެ ކަމުގެ ވައުދާއެކުގައެވެ.

ހަމައެޔާއެކު، ސިޔާސީ މަގާމްތަކަށް އައްޔަން ކުރާނީ "700" އަށްވުރެ ގިނަ ނުވާނެހެން ކަމަށް ވެސް އަދުގެ ރައީސް ޑރ މުހައްމަދު މުއިއްޒު ވަނީ އޭރު ކެމްޕެއިން ކުރައްވަމުން ވިދާޅުވެފައެވެ.

ނަމަވެސް ވެރިކަމަށް އައުމަށްފަހު މި ދެކަންތައް މަތިން ވެސް އެމަނިކުފާނު ވަނީ ހަނދާން ނެތިފައެވެ.

މަސްވެރިން ފައިސާ ނުލިބި ސަރުކާރަށް އާދޭސް ކުރަމުންގެންދާއިރު ރައީސް މުއިއްޒު އުޅުއްވަނީ ސިޔާސީ މަގާމްތަކަށް ގާތްތިމާގެ ފަރާތްތަކާއި، އެކުވެރި މިތުރުންނާއި މިހެންގޮސް އެމަނިކުފާނަށް ސަނާ ކިޔަމުންގެންދާ ފަރާތްތައް އައްޔަން ކުރުމުގައި އަވަދިނެތިކަން ފާހަގަކޮށްލެވެއެވެ.

ފިނޭންސް މިނިސްޓްރީގެ ތަފާސް ހިސާބުތަކުން އެނގޭ ގޮތުގައި މިއަހަރުގެ ފުރަތަމަ 6 މަސް ވެގެން ދިޔައިރު އެންމެ ބޮޑު ހޭދައެއް ކޮށްފައިވަނީ ސިޔާސީ މަގާމްތަކުގައި ތިއްބަވާ ފަރާތްތަކަށް މުސާރަ ދިނުމަށެވެ.

އެގޮތުން މުސާރައަށް އެކަނި 600 މިލިއަނުން ވަނީ ޚަރަދުކޮށްފައެވެ. ބައެއް ވުޒާރާ ތަކުގައި ތިއްބަވާ ސިޔާސީ މުވައްޒަފުންނަށް މުސާރަ ދިނުމަށް އެކަނި މަހެއްގެ މައްޗައް މިލިއަނެއް ހަރަދުވެއެވެ.

700 އަށްވުރެ ގިނަ ނުކުރާނެ ކަމަށް ވިދާޅުވި ނަމަވެސް ސިޔާސީ މަގާމްތަކުގެ އަދަދު މިހާރު ވަނީ 3000 އަށްވުރެ މަތީގައެވެ. މިކަން ރައީސް އޮފީހުގެ އިސް ތަރުޖަމާނު ހީނާ ވަލީދު ވަނީ ކަށަވަރުކޮށްދެއްވާފައެވެ.

އެހެންކަމުން ސިޔާސީ މަގާމްތަކުގައި ތިއްބަވާ ރައްޔިތުން ސިފަ ކުރާ "ނާގާބިލް" ފަރާތްތަކަށް ބޭކާރު ގޮތެއްގައި މުސާރަ ދިނުމަކީ ބަލައިގަނެވޭނެކަމެއް ނޫނެވެ.

އެ ފައިސާ ރާއްޖޭގެ އަގު ބޮޑު އެއް ސިނާޔަތް ދަމަހައްޓާ ހީވާގި، މަސްވެރިންނަށް ދިނުން މާލާޒިމެވެ.

މަސްވެރިންނަށް ވީ ވައުދުތައް ނުފުއްދި ލަސްވަމުންދަނީ ގައުމުގެ "މާލީ ހާލަތު" ގޯސްކަމުން" ކަމަށް ވަޒީރު އަހުމަދު ޝިޔާމް ވިދާޅުވުމާއެކު މަސްވެރިން އަންނަނީ "ސިޔާސީ މަގާމްތަކުގައި ތިއްބަވާ ފަރާތްތަކަށް" މުސާރާ ދޭން ބަލާއިރު މާލީ ހާލަތު ގޯސް ނޫންތޯ އަހަމުންނެވެ.