"ދައުލަތުގެ ޕްރޮސެކިއުޓަރ" މި ބަހުގެ މާނައަކީ އެއީ ހުރިހާ ރައްޔިތުންގެ ޕްރޮސެކިއުޓަރޭއެވެ. އެހެނީ އޭނާއަށް މުސާރަ ދެނީ ރައްޔިތުންގެ ޓެކްސްގެ ފައިސާއިން ކަމަށްވާއިރު އެ މަގާމުގައި ހުންނަ ބޭފުޅަކު މައްސަލަތައް ނިންމުމުގައި ބަލަންވާނީ ހުރިހާ ރައްޔިތުންނާ ގައުމުގެ ފައިދާއަށެވެ.

އެގޮތުން އިންސާފުވެރިކޮށް ދައުވާތައް އުފުލާ ދައުވާތައް ސާބިތުކުރުމަކީ އެއިރެއްގައި ހުންނަ ޕީޖީއެއްގެ އިސްތަށިފުޅުގައި އެޅިފައި އޮންނާނެ ނުހަނު ބޮޑު އެހާމެ ޒިންމާދާރު މަސައްކަތެއްކަން ޔަގީނެވެ.

މައްސަލައެއް ޕްރޮސެކިއުޓަރގެ އޮފީހަށް ލިބުމަށް ފަހު އެ އޮފީހުގެ އެންެމެ އިސް މަސްއޫލިއްޔަތަކަށްވާން ޖެހޭނީ އޭގެ ތެދު ދޮގު ކަށަވަރުކޮށް އެ މައްސަލައެއް އެންމެ އިންސާފުވެރި ގޮތަކަށް ނިންމުމެވެ. އެގޮތުން ދައުވާ އުފުލާ ވަރަށް ހެއްކާ ގަރީނާ ހުރިތޯ ނުވަތަ ނޫންތޯ ކަނޑައަޅާ ދައުވާ އުފުލަން ފޮނުވަން ޖެހޭނެއެވެ.

ބައެއް މައްސަލަތަކުގައި ދައުވާތައް އަނބުރާ ނަގަން ނަގަން ޖެހޭިއރު އެއިން ގިނަ ފަހަރުތަކުގައި އޮންނަނީ ދައުލަތުގެ، އާދެ ޕްރޮސެކިއުޓަރ ގެ ކޮންމެވެސް މައްސަލައެއް ނުވަތަ އިޖުރާއާތެއް ފުރިހަމަ ނުވެގެން ކަމަށެވެ.

މިއީ އެންމެ ފުރަތަމަވެސް މި ރިޕޯޓުގައި ފާހަގަކޮށްލި ކަމެވެ.

އެއް ބާވަތެއްގެ ނުވަތަ އެއް މައްސަލައެއްގެ ތެރެއިން އެކި މީހުންނަށް ދައުވަ ކުރަން ފޮނުވުމުގައާ ތަހުގީގު ހިންގުމުގައިވެސް ތަފާތުކުރުން ގެންގުޅެން ނުވާނެއިރު ބައެއް ފަހަރު މައްސަލަތަކުގައި މިކަހަލަ ބޭ އިންސާފުވެރިކަން ފެނިގެން ގޮސްފައިވެއެވެ.

އެގޮތުން ދާދި އިހަކަށް ދުވަހު ފެންމަތިވި ކަމަށް ނަޒަރެއް ހިންގާލާނަމެވެ.

އޮފީހުގައި ވަރަށް ބިޒީކޮށް އުޅެނިކޮށް ލޮލުގައި އަޅައިގަތީ ގަބޫލުކުރަން އުނދަގީ ސުރުޚީއެކެވެ. އާދެ، ރައްޔިތުންގެ މަޖިލީހުގެ ކުރީގެ މެމްބަރު އަހުމަދު ނިހާނު ހުސެއިން މަނިކުގެ މައްޗަށް، އެމްއެމްޕީއާރުސީގެ ހިޔާނާތުގެ މައްސަލައިގެ ތެރެއިން އުފުލާފައިވާ ހުރިހާ ދައުވާތަކެއް އަނބުރާ ގެންދަން ދިވެހިރާއްޖޭގެ ޕްރޮސެކިއުޓަރ ޖެނެރަލްގެ އޮފީހުން ނިންމި ޚަބަރެކެވެ.

ހައިރާނުން ބައިނާޅި ކެވިފައިހުރެ ޚަބަރުގެ ތަފްސީލު ކިޔާލިއިރު އޮތީ، ރައީސް އަބްދުﷲ ޔާމީންގެ މައްޗަށް ގއ ވޮޑެމުލާ މައްސަލައިގައި ދަށު ކޯޓުން ކުރި ހުކުމުގެ އިސްތިއުނާފުގެ މައްސަލާގައި 2021 ވަނަ އަހަރު ސުޕްރީމް ކޯޓުން ކުރި ހުކުމަށް ރިއާޔަތްކޮށް ބެލިއިރު، ނިހާންގެ މައްޗަށް އެ ދައުވާ ސާބިތުވާނެ ކަމަށް ނުބެލެވޭތީ ކަމަށް ބުނެއެވެ.

ނިހާންގެ މައްޗަށް 2019 ވަނަ އަހަރުގައި ކޮށްފައިވާ ރިޝްވަތަށް އެދުމުގެ ދެ ދައުވާއަކާއި ރިޝްވަތު ހިފުމުގެ ތިން ދައުވާއެއްގެ އިތުރުން މަނީލޯންޑްރިންގެ ދައުވާ ވެސް އަނބުރާ ގެންދަން ޕީޖީއިން ނިންމީ، ރައްޔިތުންގެ މަޖިލީހުގެ އިދާރާގެ ބިއުރޯ ޗީފަކަށް ރައްޔިތުންގެ މަޖިލީހުގެ ކުރީގެ މެމްބަރު އަހުމަދު ނިހާން ހުސައިން މަނިކު، ރައްޔިތުންގެ މަޖިލީހުގެ ރައީސް ޢަބްދުއްރަޙީމް ޢަބްދުالله އައްޔަނުކުރައްވިކަން އިއުލާންކުރެއްވިތާ މާގިނަ އިރުތަކެއް ނުވެއެވެ.

އަސްތާއެވެ. މިވީ ގޮތް ރޭކާލީ ދެނެވެ. ނިހާންއަކީ މި ސަރުކާރުގެ އިސްވެރިންގެ ބާ ގާތް ބޭފުޅަކަށްވީތާއެވެ.

ކޮންމެ އަކަސް ރައީސް ޔާމީންގެ މައްސަލައެއްގެ ތެރެއިން ރާއްޖޭގެ އއަދުލުގެ ނިޒާމުގެ އެންމެ މަތީ ކޯޓުން ކުރި ހުކުމަކަށް ރިއާޔަތްކޮށް ނިހާނުގެ ދައުވާތައް އަނބުރާ ގެންދަން ޖެހޭ ކަން ޕީޖިއަށް ވިސްނިގެން ނަމަވެސް ނުވަތަ ނުފޫޒުން ކުރުވި ކަމެއް ނަމަވެސް ހަމަ އެ ހުކުމް އެހެން އޮއްވާ ރައީސް ޔާމީންގެ މައްޗަށް ވަނީ ފަޓާސް ބަރިއެއްހެން ދައުވާތއް ކޮށް ހުކުމް ވެސްކޮށްފައެވެ.

ނަމަވެސް ހުންނެވީ ހަމަ އެއް ޕީޖީއެކެވެ. އާދެ، އަލްއުސްތާޛު ހުސެއިން ޝަމީމެވެ. އުސްތާޛެއްގެ ލަގަބުގައި ހުންނެވިއިރު އިންސާފުވެރިކަން އޮތީ މީޒާނުން ބޭރުވެފައެވެ. ފޮތެއް އޮތަކަސް އެދުރެއް ނުވާނެއޭ މީހުން ބުނެ އުޅޭތާއެވެ. ނަމަވެސް އަޅުގަޑަށް މިކަމުގައި ފަހުމުވީ މުޅިން އެހެން އެނގަލްއަކުންނެވެ.

އެހެނީ މިކަމެއް ހިނގައިދިޔައީ ގައުމުގައި އެހެން ކަހަލަ އަޑެއް ގުގުމާފައިވަނިކޮށް ކަމަށްވުމުންނެވެ. އެގޮތުން އިސްލާމް ދީނަށް ތައުހީނުކޮށް ރަސޫލާ (ސއވ)އަށް ފުރައްސާރަކޮށް ރިޕޯޓު ނެރުނު ލާދީނީ ޖަމްއިއްޔާ އެމްޑިއެންގެ އެއް އިސްވެރިޔާ ޝަމީމު، ޕިީއެންސީގެ ރިޔާސީ ދައުރު ނިމެންދެން މަގާމުގައި ބަހައްޓަން ވަރަށް ސިއްރު ޑީލެއް ރައީސް އޮފީހުގެ ތެރެއިން ހަދާފައިވާކަމުގެ އަޑު ގަދަވެފައިވަނިކޮށް މިކަން ހިނގައިދިއުމުން ދެން ފަހުމުވެގެން ދިޔައީ ޕީޖީ ގޮފަޅު ގޮނޑި ކޮއްކޮއަކަށްވީކަމެވެ.

މަގާމުގެ ދިފާއުގައި ރައީސް އޮފީހުގެ ޑީލް ޝަމީމު ގަބޫލުކުރިއިރު ރައީށް އޮފީހުގެ ޑީލަކަށްވީ ރައީސް ޔާމީންގެ މައްސަލަތައް މަޑު ޖައްސާ ނުލާ ކުރިއަށް ގެންދިއުމެވެ.

އެހެންކަމުން މިއަދު ދައުލަތުގެ ޕްރޮސެކިއުޓަރޭ ބުނެވޭކަށް ނެތްތާއެވެ. އެހެނީ ފެނިގެން މިދަނީ ޕްރޮސެކިއުޓަރު ވަކި ބައެއްގެ މަސްލަހަތު ހިމާޔަތްކުރަމުން ދާ މަންޒަރުކަމަށް ވުމުންނެވެ.

ދައުލަތުން ކުރާ ދައުވާތަކަކީ ނުފޫޒެއްނެތި ކުރާކަމެއް ނޫންކަން ސާބިތުވެއްޖެއެވެ. ދައުލަތުގެ ޕްރޮސިކިއުޓަރަކީ ގޮފަޅު ގޮޑިކޮއްކޮއެއްކަން ސާބިތުވެއްޖެއެވެ. ދައުލަތުން ކުރަނީ ބުރަދަނެއް ނެތް ކުޅޭކުޅޭ ދައުވާތަކެއްކަން ހާމަވެގެން ހިނގައްޖެއެވެ. 

ނިހާނުގެ މައްޗަށް އުފުލި ދައުވާތައް އަނބުރާ ގެނައުމުން ޝަރީއަތަށް ރައީސް މުހައްމަދު މުއިއްޒު ނުފޫޒު ފޯރުވާވަރު ހާމަވެގެން ދިޔައީ ދައުލަތުގެ އިސް މަގާމަކަށް ނިހާނު އައްޔަނުކުރި ކުރުމުންނެވެ. ނިހާނު އިސްކުރި މަގާމަކީ ރައީސް މުއިއްޒަށް އިސްކުރެވޭނެ މަގާމެއް ނޫނޭ ބަޔަކު ބުނެފާނެއެވެ. ރައްޔިތުންގެ މަޖިލީހަކީ ވަކިބާރެކޭ ކިޔާފާނެއެވެ. އެކަން އޮތީ އެހެން ނޫންކަން އެންމެނަށްމެ އެނގެއެވެ. ރައްޔިތުންގެ މަޖިލީހުގެ ރައީސަކަށް ބައިންދަންވީ މީހާ ރައީސް މުއިއްޒު ކަނޑައަޅާ ހިސާބަށް ބަދެވިފައިވާ މަޖިލީހެއްގައި އެމަނިކުފާނު ބޭނުންވެގެން ކުރާކަމެއް ނޫނީ ނުކުރެވޭނެ ނޫންތޯއެވެ. 

މަޖިލީހުގެ އިދާރީ ވެރިކަމެއް ކޮރަޕްޝަނާއި ރިޝްވަތާއި ފަސާދައިގެ ތުހުމަތުން ފޯވެފާހުރި ނިހާނަށް ދިނުމަށް މައްސަލަތައް އަނބުރާ ގެންދިއުމަކީ ރައީސް މުއިއްޒު ބޮޑުކޮށް ޝަރީއަތަށް އަތްބާނާކަމުގެ ހެއްކެކެވެ. މަޖިލީހެއް ފަނޑިޔާރުގެއެއް މިނިވަން މުއައްސަސާއެއް ވެސް ރައީސް މުއިއްޒުގެ ނުފޫޒުން ނެއްޓިފައެއް ނެތްކަމުގެ އަލި ގަދަ ހެއްކެކެވެ.