ހަރަދަށް ޒިންމާވުމާ ގުޅޭ މުޅިން އާ ބިލެއް ރައްޔިތުންގެ މަޖިލީހަށް ހުށަހަޅައިފިއެވެ.

މަރުކަޒީ ބޭންކް (އެމްއެމްއޭ)އިން ދައުލަތުން ދަރަންޏަށް ފައިސާ ނެގޭ އަދަދު މިހާރަށްވުރެ އިތުރުކޮށް، މިހާރު އަމަލުކުރަމުން އަންނަ ދައުލަތުގެ ޚަރަދަށް ޒިންމާވުމުގެ ގާނޫނުގެ ބަދަލުގައި ދައުލަތުގެ ފިސްކަލް ޒިންމާގެ ގާނޫނެއް ފާސްކުރަން މިއަދު ރައްޔިތުންގެ މަޖިލީހަށް ހުށަހެޅީ، ތުލުސްދޫ ދާއިރާގެ މެމްބަރު އިބްރާހިމް ނަސީމެވެ.

މިއަދު ސަރުކާރުގެ ފަރާތުން މަޖިލީހަށް ހުށަހެޅި ބިލުގައި ބުނެފައިވަނީ:

ދައުލަތުގެ މަރުކަޒީ ބޭންކުން ސަރުކާރުން ފައިސާ ނަގަންވާނީ، ދައުލަތުގެ ކޭޝްފްލޯ މެނޭޖްކުރުމަށް، އަދި ގިނަވެގެން 91 ދުވަހުގެ ތެރޭގައި އެ ފައިސާ ދައްކާ ޚަލާސްކުރާ ގޮތަށް، އެޑްވާންސެއްގެ ގޮތުގައެވެ. މި ގޮތުން ފައިސާ ނެގޭނީ، ވޭތުވެދިޔަ ތިން އަހަރު ދުވަހުގެ ތެރޭގައި ސަރުކާރަށް ލިބުނު އާމްދަނީގެ މައްޗަށް ބިނާކޮށް އަހަރަކަށް ޖެހޭ އެވްރެޖު އާމްދަނީގެ 2.5 އިންސައްތައަށް ވުރެ އިތުރުނުވާނެ ގޮތެއްގެ މަތިންނެވެ.

އެހެންވެ، ސަރުކާރުން މިއަދު ހުށަހެޅި ފިސްކަލް ޒިންމާގެ ގާނޫނުގެ ދަށުން މިހާރު ފައިސާ ޗާޕުކުރެވޭ އަދަދަށް ވުރެ ގިނައިން ޗާޕުކުރެވޭނެއެވެ.

ސަރުކާރުން ހުށަހެޅި ބިލުގައި ވާގޮތުން ކޮންމެ ރިޔާސީ ދައުރެއް ފެށުމާ އެކު ފުރަތަމަ ހަ މަސް ދުވަހުގެ ތެރޭގައި ފިސްކަލް ޒިންމާގެ ޗާޓަރެއް އެކުލަވައިލަން ޖެހޭނެއެވެ. އެކަން ކުރަންޖެހޭނީ ފިނޭންސް މިނިސްޓަރެވެ. އަދި، އެ ޗާޓަރު މަޖިލީހުން ފާސްކޮށް، ގެޒެޓުގައި ޝާއިއުކުރަންވާނެ ކަމަށް އެ ބިލުގައި ވަނީ ބަޔާންކޮށްފައެވެ.

ބިލުގައިވާގޮތުން ސަރުކާރުން ބޭނުންވެއްޖެ ނަމަ ފިސްކަލް ޒިންމާގެ ޗާޓަރު މުރާޖާ ވެސް ކުރެވޭނެއެވެ.

މި ބިލުގައި ހުށަހަޅާފައިވާ ކަންކަމުގެ ތެރެއިން އެންމެ ބޮޑަށް ފާހަގަވީ އެމްއެމްއޭއިން ދަރަންނަށް ފައިސާ ނެގުމާ ގުޅޭ ނުވަތަ މަރުކަޒީ ބޭންކުން އެޑްވާންސްއަށް ފައިސާ ނެގުމުގެ ހަމަ ބަޔާންކުރާ މާއްދާ އެވެ. މިހާރު އަމަލުކުރަމުން އަންނަ ގާނޫނުގައި އޮންނަ ގޮތުން ސަރުކާރަށް އެމްއެމްއޭއިން ނެގެނީ ދައުލަތަށް ލިބުނު ތިން އަހަރުގެ އާމްދަނީގެ އެވަރެޖުގެ 1 ޕަސެންޓުން 2.5 ޕަސެންޓަށް މަތިކުރުމެވެ.

މިހާރު އަމަލުކުރަމުން އަންނަ ދައުލަތުގެ ހަރަދަށް ޒިންމާވުމުގެ ގާނޫނުގައި އޮންނަ ގޮތުން އެމްއެމްއޭއިން، ސަރުކާރުން ދަރަންޏަށް ފައިސާ ނެގޭނީ، 91 ދުވަހުގެ ތެރޭގައި އެ ފައިސާ ދައްކާ ހަލާސްކުރާ ގޮތަށް އެ އިރެއްގައި މާކެޓް އިންޓްރެސްޓް ރޭޓަށް ވުރެ ދަށް ނޫން ރޭޓެއްގައި އެޑްވާންސެއްގެ ގޮތުގަ އެވެ. މިގޮތަށް ޕަބްލިކް ބޭންކް އެކައުންޓު އޯވާޑްރޯ ކުރުމަކީ ފައިސާ ޗާޕުކުރެވޭ ގޮތެކެވެ.

ބިލުގައި އޮތް ގޮތަށް ގާނޫނު ފާސްކޮށް އަމަލުކުރަން ފަށައިފިނަމަ، މިހާރު ނެގޭ 277 މިލިއަން ވަރަކަށް ރުފިޔާގެ ބަދަލުގައި 694 މިލިއަން ރުފިޔާ ދަރަންޏަށް ނެގޭނެ އެވެ. މިއީ ގާތްގަނޑަކަށް 150 ޕަސެންޓުގެ އިތުރުވުމެކެވެ.

މި ބިލުގެ ފުރަތަމަ ކިޔުން މިއަދު އިއްވާފައިވާއިރު، ބިލާ މެދު ގޮތެއް ނިންމާނީ މެމްބަރުން ބަހުސްކުރުމަށް ފަހުގައެވެ.

އެމްއެމްއޭއިން ދަރަންޏަށް ނެގޭ ފައިސާގެ މިންވަރު އިތުރުކުރަން ސަރުކާރުން މަސައްކަތް ކުރަމުން މިދަނީ ކުރީ ސަރުކާރުގައި އެޑްވާންސަށް ފައިސާ ނެގޭ ލިމިޓާ ގުޅޭ މާއްދާ ސަސްޕެންޑް ކުރުމަށް ފަހު ފައިސާ ޗާޕު ކުރުމުން އިގުތިސޯދު އަނދަވަޅަކަށް ވެއްޓިފައިވާ ކަމަށް ބުނުމަށް ފަހުއެވެ.