ރައްޔިތުންގެ އަތުން ނަގާ ޓެކްސް ބޮޑު ނުކުރާނެކަމުގެ ވައުދާއެކު އައިސް ޓެކްސް ބޮޑުކޮށްފިއެވެ.

ރައީސް ޑރ. މުހައްމަދު މުއިއްޒުގެ ސަރުކާރުން ވަނީ ދައުލަތުގެ އާމްދަނީ އިތުރުކޮށް، ހަރަދުތައް ހަމަޖެއްސުމަށް ކަމަށް ބުނެ ޖީއެސްޓީ، ޓީޖީއެސްޓީ އަދި އިމްޕޯޓް ފީތައް ބޮޑުކުރަން ނިންމާފައެވެ.

ފިނޭންސް މިނިސްޓްރީއިން ކުރިއަށް އޮތް ހަތަރު އަހަރު ދުވަހަށް ސަރުކާރުގެ އާމްދަނީގެ ސިޔާސަތު ނުވަތަ މީޑިއަމް ޓާމް ރެވެނިއު ސްޓްރެޓެޖީ (އެމްއެމްޓީއާރުއެސް)ގެ ގޮތުގައި އާންމުކުރި ރިޕޯޓުގައިވާ ގޮތުން މިއަންނަ އަހަރުގެ ތެރޭގައި ގިނަ ބާވަތެއްގެ ޓެކްސް ބޮޑުކޮށް ބައެއް ފީތައް ބޮޑުކުރާނެއެވެ.

ބޮޑުކުރަން ނިންމައިފައިވާ ފީ އަދި ޓެކްސްތައް:

ގްރީން ޓެކްސް ބޮޑުކުރުން
ޖީއެސްޓީ ނަގާ ތަކެތި އިތުރުކުރުމާއި ޖީއެސްޓީ ބޮޑުކުރުން
ރަލާއި، ދުންފަތް އަދި އޫރުމަސް ފަދަ ހާއްސަ ބާވަތްތަކުން ނަގާ ޓެކްސް ބޮޑުކުރުން ނުވަތަ އެ ސިޔާސަތަށް ބަދަލުތަކެއް ގެނައުން
އިމްޕޯޓް ޑިއުޓީ ނަގާ ރޭޓްތައް ބޮޑުކުރުން
ޓެލެކޮމް އޮޕަރޭޓަރުންގެ ހިދުމަތްތަކުން ނަގާ ފީތައް ބޮޑުކުރުން
ރިސޯޓް ކުއްޔާއި ޓޫރިޒަމް ބޭނުންތަކަށް ދޫކޮށްފައިވާ ބިންތަކުގެ ކުލި ބޮޑުކުރުން ހިމެނެއެވެ.

2026، 2027 އަދި 2028 ވަނަ އަހަރު އަޅަން ނިންމައިފައިވާ ފިޔަވަޅުތައް:

ޕްރޮޕަޓީ ޓެކްސް ނިޒާމެއް ތައާރަފްކުރުން
އިންކަމް ޓެކްސް ނަގާ އާމްދަނީ ދަށްކުރުން
ކުދި އަދި މެދު ފަންތީގެ ވިޔަފާރިތަކަށް ޓެކްސްގެ އިދާރީ ބުރަ ކުޑަކުރުން
ކާބަން ކްރިޑިޓް ބޭރުގެ މާކެޓްތަކުގައި ވިއްކައިންގެން އާމްދަނީ ހޯދުން
ބުރިޖް ފަދަ ތަންތަނުން ފީ ނެގޭނޭ ސިޔާސަތެއް އެކުލަވާލުން

ހަތަރު އަހަރު ދުވަހު ސަރުކާރުގެ އާމްދަނީގެ ސިޔާސަތު ނުވަތަ މީޑިއަމް ޓާމް ރެވެނިއު ސްޓްރެޓެޖީ (އެމްއެމްޓީއާރުއެސް) ސަބަބުން ޖީޑީޕީގެ ނިސްބަތުން ދައުލަތުގެ އާމްދަނީ %35.5 އިތުރުވާނޭ ކަމަށާއި މިހާރު ޓެކްސް އާމްދަނީއަކީ ޖީޑީޕީގެ ނިސްބަތުން %32.5 ކަމަށް ފިނޭންސުން ބުންޏެވެ.

ނަމަވެސް މި ސަރުކާރަކީ ރައްޔިތުން އަތުން ނަގާ ޓެކްސް ބޮޑުކޮށްގެން ދައުލަތުގެ އާމްދަނީ އިތުރުކުރުމުގެ ވިސްނުން ނުގެންގުޅޭނެކަމުގެ ވައުދާ އެކު އައި ސަރުކާރެކެވެ. ނަމަވެސް ސިޔާސީ މަގާމުތައް ދައުލަތުގެ ޚަރަދަށް ނުބައްދަލު މިންވަރަށް އިތުރުވެ މުސާރަ ދޭނެ ގޮތެއް ނެތުމުން ރައްޔިތުން އަތުން ނަގާ ޓެކްސް ބޮޑުކުރަން ނިންމުމުން ރައްޔިތުން ދަނީ ފާޑުކިޔަމުންނެވެ.