މާލޭގެ މަގަކަށް "ފަލަސްތީނު ހިނގުން" ކިޔަން ސިޓީ ކައުންސިލުން ފާސްކޮށްފިއެވެ.

މި ނިންމުން ކައުންސިލުން ނިންމާފައިވަނީ މިއަދު ކުރިއަށްދިޔަ މާލެ ސިޓީ ކައުންސިލުގެ ރަސްމީ އާންމު ޖަލްސާގައެވެ.

ސިޓި ކައުންސިލުން އެ ނަން ދިނުމަށ ފާސްކުރީ، މާފަންނު މަދަރުސާގެ ބިތްދޮށުން، ކަނބާއައިސާ ރަނި ހިނގުމުން ބޮޑުތަކުރުފާނު މަގަށް ނުކުމެވެން އޮންނަ ހަނި ގޯޅިއަށެވެ.

އެ ގޯޅިއަށް " ފަލަސްތީނު ހިނގުން" ކިޔަން ފާސްކުރީ މިއަދުގެ އާންމު ޖަލްސާގައި ބައިވެރިވެވަޑައިގެންނެވި ކައުންސިލަރުންގެ އިއްތިފާގުންނެވެ.

މަގު ޑިޒައިން ކުރުމަށް ނިންމާފައިވަނީ ފަލަސްތީނުގެ ތާރީހާ ގުޅޭ މައުލޫމާތު ފެންނަ ގޮތަށެވެ. މަގު ރަސްމީކޮށް ހުޅުވުން އޮންނާނީ މިހާރު ގޯޅީގައި ކުރިއަށް ދާ ދުވާރުގެ މަސައްކަތްތައް ފަދަ ކަންކަން ނިމުމުންނެވެ.

މާލޭގެ މަގަކަށް ފަލަސްތީނުގެ ނަން ދިނުމަށް ކައުންސިލަށް ހުށަހެޅުއްވީ މާލެ ސިޓީގެ މޭޔަރު، އާދަމް އާޒިމް އެވެ. އެ ހުށަހެޅުން ހުށަހެޅުމުން މާލެ ސިޓީ ކައުންސިލުގެ އެންމެ މެންބަރަކު ފިޔަވައި ހުރިހާ މެންބަރުން ވެސް އެކަމަށް ތާއީދު ކުރެއްވިއެވެ.

އެގޮތުން މާލޭގެ މަގަކަށް ފަލަސްތީނު ހިނގުން ކިޔައިފި ނަމަ ރާއްޖޭގެ ފަތުރުވެރިކަމަށް ގެއްލުން ވާނެ ކަމަށް ވިދާޅުވެ އެކަމާ ދެކޮޅު ހެއްދެވީ ޕީޕީއެމް އަށް ނިސްބަތްވާ މައްޗަންގޮޅީ އުތުރު ދާއިރާގެ ކައުންސިލަރު ސައީދާ ރަޝާދު އެވެ.