ހ.ހުދުފިނިފެންމާގޭގައި ދިރިއުޅޭ މީހުންނަށް ގެއިން ނިކުމެވޭނެ ގޮތް ނުވެ ބަންދުވެފައި ވަނީ ގަވާއިދާ ޚިލާފަށް ގޭގެ ރަޖިސްޓްރީ ހަދާދިނުމުން ކަމަށް މާލޭ ސިޓީ ކައުންސިލުން މިއަދު ހާމަކޮށްފިއެވެ.

މިއަދު ބޭއްވި ނޫސްވެރިންގެ ބައްދަލުވުމުގައި އެ ކައުންސިލުގެ ވަކީލު އަބްދުﷲ އަބަދުލް ހަކީމް ވަނީ މި ހާދިސާ ހިނގަން މެދުވެރިވި ސަބަބު ހިއްސާ ކުރައްވާ މި މައްސަލައަށް މިހާރު 27 އަހަރު ވެފައިވާ ކަމަށް ބުނެފައެވެ.

އެ ގޯތީގެ ބޮޑުމިނަކީ 3،980 އަކަފޫޓު ކަމަށާއި އެންމެ ފުރަތަމަ އެ ގޯތި ބަހާފައި ވަނީ ދެ ބަޔަށް ކަމަށް އޭނާ ވަނީ ވިދާޅުވެފައެވެ. އެއީ ހުދުފިނިފެންމާގެއާއި ހުދުދިނިފެންމާގެ އާގެއެވެ. ހަކީމް ވިދާޅުވީ އެ ގޯޅިގަނޑަކީ 320 އަކަފޫޓުގެ ގޯޅި ގަނޑެއް ކަމަށާއި ހުދުފިނިފެންމާގެ އާގެއަށް 1985 އަކަފޫޓު ހިމެނެނީ އެ ގޯޅިއާ އެކުގައި ކަމަށެވެ.

2020 އަހަރު މާލެ ސިޓީ ކައުންސިލުން ވަކި ރަޖިސްޓްރީއެއް ހުދުފިނިފެންމާގެ އަށް ހަދައިފައިވާއިރު އެ ރަޖިސްޓްރީގައި އިމާރާތްކުރުމަށް ވަނީ ހުއްދަދީފައެވެ. އަދި ހުދުފިނިފެންމާގޭ ފަހަތުގައި އޮތް ބަޔަށް ނުވަދެވޭ ގޮތްވީ މި ރަޖިސްޓްރީ މާލެ ސިޓީ ކައުންސިލުން ހަދައިދިނުމުން ކަމަށެވެ.

މި މައްސަަލަ ހޫނުވެފައި ވަނީ ހުދުފިނިފެންމާގޭ އާގޭގެ ފާރު ރޭނުމުން ކަމަށާއި ބައެއްގެ ގޭގެ އިންފާރު ރޭނުން ސިޓީ ކައުންސިލުން މަނާ ނުކުރެވޭނެ ކަމަށް އޭނާ ވިދާޅުވިއެވެ.

މި މައްސަލަ ހައްލު ކުރުމުގެ މަސައްކަތް ކުރަމުންދާ ކަމަށްވެސް ހަކީމް ފާހަގަކުރެއްވިއެވެ.