ފިނޭންސް މިނިސްޓްރީން ކޮންމެ ހަފުތާއަކު ނެރޭ ވީކްލީ ފިސްކަލް ޑިވެލޮޕްމެންޓް ރިޕޯޓް ނުނެރޭތާ ތިން ހަފުތާ ވެއްޖެކަން ހާމަވެއްޖެއެވެ.
އެ ވުޒާރާއިން އެންމެ ފަހުން އެ ރިޕޯޓް ނެރެފައިވަނީ ޖޫން މަހުގެ 20 ވަނަ ދުވަހުއެވެ.
ދައުލަތުގެ މާލީ ހިސާބުތައް އާންމުނުކުރާތީ ރައީސް އަބްދުﷲ ޔާމީން އަބްދުލްގައްޔޫމް ވަނީ ބުރާސްފަތި ދުވަހުގެ ރޭ ފްރޮންޓް އޮފީހުގައި އޮތް ޖަލްސާގައި ސަރުކާރަށް ފާޑު ވިދާޅުވެފައެވެ.
އެގޮތުން އެމަނިކުފާނު ވިދާޅުވީ ގަވައިދުން ޝާއިއުކުރަމުން ދިޔަ މާލީ ހާލަތާ ގުޅޭ ރިޕޯޓުތައް މިހާރު ސިއްރުކޮށްފައިވާ ކަމަށެވެ.
ރާއްޖޭގެ މާލީ ހާލަތު ގޯސްކަމަށް ސަރުކާރުން ބުނަމުން އަންނަ އިރު ސަރުކާރުން ކުރާ ބޭކާރު ޚަރަދުތައް އަދިވެސް ހުއްޓާލާފައިނުވާކަން ފާހަގަކޮށްލެވެއެވެ.
