މިއަދު ހަވީރު މާލޭގައި ވެހިކަލް ދުއްވުން މަނާކޮށް ނެރުނު ޓްރެފިކް ނޯޓިސް ކެންސަލްކޮށްފައިވާނެ ކަމަށް މާލެ ސިޓީ ކައުންސިލުން ބުނެފިއެވެ.

މި ނޯޓިސް ކެންސަލް ކުރަން ކައުންސިލުން ނިންމާފައިވަނީ މިއަދު ބޭއްވުމަށް ހަމަޖެހިފައި ކުރިން އޮތް މިނިވަން ދުވަހުގެ ޝަރަފުގެ ހިނގާލުން، ވިއްސާރަވުމާއި ގުޅިގެން ކެންސަލް ވެފައިވާތީ ކަމަށް އެކައުންސިލުން ބުނެފައިވެއެވެ.

ސިޓި ކައުންސިލުން ކުރިން ނެރުނު ނޯޓިހުގައިވާ ގޮތުން 26 ޖުލައި 2024 ވަނަ ދުވަހުގެ ހަވީރު 16:00 އިން 18:00 އަށް މާލޭގައި އެއްގަމު އުޅަނދު ދުއްވުން މަނާ ވަގުތެއްގެ ގޮތުގައި ހަމަޖައްސަވާފައިވާނެއެވެ. އަދި އެއްގަމު އުޅަނދު ދުއްވުން މަނާކުރަނީ ޝަރަފުގެ ހިނގާލުން ކުރިއަށްދާ ވަގުތު މާލޭގެ މަގުތަކުގެ ޓްރެފިކް ފްލޯ މެނޭޖްކުރުމަށް ދަތިވާނެތީ ކަމަށްވެސް ބުނެފައިވެއެވެ.

މޯލްޑިވްސް ނެޝަނަލް ކެޓޭޓް ކޯޕްސް (އެމްއެންސީސީ)އިން ކޮށްފައިވާ ޕޯސްޓެއްގައި ހާމަކޮށްފައިވަނީ މިނިވަންދުވަހުގެ މުނާސަބަތުގައި މާލޭގައި މިއަދު ބޭއްވުމަށް ތާވަލްކުރެވިފައިވާ ޝަރަފުގެ ހިނގާލުން، މޫސުން ތަންނުދިނުމުގެ ސަބަބުން ފަހުގެ ތާރީހަކަށް ފަސްކުރެވިފައިވާ ކަމަށެވެ. ނަމަވެސް ފަސްކުރެވުނު ވަކި ތާރީހެއް ހާމައެއް ނުކުރެއެވެ.

އެމްއެންސީސީގެ އިތުރުން ވެސް އެމްއެންޑީއެފުން ވެސް ވަނީ މޫސުން ގޯސްވުމުގެ ސަބަބުން މި ހިނގާލުން ފަސްކޮށްފައިވާކަން އިއުލާނު ކޮށްފައެވެ.