މީގެ ކުރިން ސަރުކާރުތަކުން ހާމަކުރަމުން އައި ސިޔާސަތުތަކެއް ސިއްރުކުރަން ފިނޭންސް މިނިސްޓްރީއިން ރައްޔިތުންގެ މަޖިލީހުގެ މާލިއްޔަތު ކޮޮމިޓީގައި އެދިއްޖެއެވެ.

އެގޮތުން ފިނޭންސުން ސިއްރު ކުރަން އެދިފައިވަނީ ދައުލަތުގެ ހަރަދާ  އާމްދަނީ އަދި ދަރަނީގެ ސިޔާސަތުތަކެވެ.

ފިނޭންސުން މިފަދައިން އެދިފައިވާކަން ހާމަކޮށްފައިވަނީ މިއަދު ބޭއްވި އެ ކޮމިޓީގެ ބައްދަލުވުމުގައި ކޮމިޓީގެ މުގައްރިރު، މާމިގިލީ ދާއިރާގެ މެންބަރު ގާސިމް އިބްރާހިމްއެވެ.

ބައްދަލުވުން ފައްޓަވަމުން ގާސިމް ވިދާޅުވީ، މާލީ ކަންކަމާ ގުޅޭ ތިން ލިޔުމެއް މާލީ ވުޒާރާއިން ކޮމިޓީއާ ހިއްސާކޮށްފައިވާ ކަމަށާ އަދި އޭގެ ތެރެއިން ދެ ލިޔުމެއް ސިއްރު ކޮށްދޭން މިނިސްޓްރީގެ ފަރާތުން އެދިފައިވާ ކަމަށެވެ.

ސިއްރު ކުރަން މާލީ ވުޒާރާއިން އެދުނު ލިޔުންތަކަކީ، 2024 ވަނަ އަހަރުން 2026 ވަނަ އަހަރަށް މެދު ރާސްތާ ފިސްކަލް ސްޓްރެޓެޖިީ ނުވަތަ އާމްދަނީ އާއި ހަރަދުގެ ސިޔާސަތު އަންގައިދޭ ބަޔާނާ ދައުލަތުގެ ދަރަނީގެ ސްޓްރެޓަޖީ ނުވަތަ ދައުލަތުން ދަރަންޏާ ގުޅޭ ސިޔާސަތު ގެންގުޅޭނެ ގޮތުގެ ބަޔާނެވެ.

އެހެންކަމުން ކޮމިޓީއިން ދެ ފަހަރެއްގެ މަތިން ވޯޓު ލައިގެން ވަނީ އެ ބައްދަލުވުން ސިއްރުކުރަން ނިންމާފައެވެ.

ދައުލަތުގެ ހަަރަދަށް ޒިންމާވުމުގެ ގާނޫނުގައިފައިވާ ގޮތުން މިނިސްޓްރީން ސިއްރު ކުރަން އެދުނު އެ ދެ ލިޔުމަކީ ކޮންމެ އަހަރެއްގެ ޖުލައި މަސް ނިމުގެ ކުރިން މާލީ ވުޒާރާއިން މަޖިލީހާ ހިއްސާ ކުރަން ޖެހޭ ދެ ބަޔާނެވެ.  އޭގެ ތެރެއިން، ފިސްކަލް ސިޔާސަތުގެ ބަޔާނަކީ ކޮންމެ އަހަރަކު އެއް ފަހަރު ސަރުކާރުގެ ގެޒެޓްގައި ޝާއިއުކުރަން ޖެހޭ ބަޔާނެއް ކަމަށް ގާނޫނުގައި ބުނެއެވެ. އަދި މީގެ ކުރިން  މާލީ ވުޒާރާއިން އެ ރިޕޯޓްތައް މަޖިލީހާ ހިއްސާކުރުމަށް ފަހު ވެބްސައިޓުގައި އާންމު ވެސް ކުރެއެވެ.