ދައުލަތުގެ މާލީ ހިސާބުތަކުގެ ރީކޮންސިލިއޭޝަން މަސައްކަތް ނިންމުމަށް ފަހު މިދިޔަ މަހުގެ ފަހު ހަފުތާގެ ތެރޭގައި އާންމުކުރާނެ ކަމަށް ފިނޭންސް މިނިސްޓްރީން ބުނުމަށް ފަހު އެ ތާރީހަށް ވެސް ހިސާބުތައް އާންމު ނުކުރާކަން ހާމަވެއްޖެއެވެ.

ފިނޭންސުން ވީކްލީ ފިސްކަލް ރިޕޯޓެއް އެންމެ ފަހުން އާންމުކޮށްފައި ވަނީ ޖޫން މަހުގެ 20 ވަނަ ދުވަހުއެވެ.

އެއީ މީގެ 50 ވަރަކަށް ދުވަސް ކުރިން ކަން ފާހަގަކޮށްލެވެއެވެ.

މާލީ ހިސާބުތައް އާންމު ނުކުރުމުގެ އިތުރުން މި ފަހުން ފިނޭންސް މިނިސްޓްރީން ކަންކަން ކުރަމުން އަންނަނީ މާލީ ހާމަކަމުގެ އަސާސާ ދިމާ އިދިކޮޅަށެވެ.

އެގޮތުން މެދު ރާސްތާގެ ފިސްކަލް އިސްތިރާޖު (ސްޓްރެޓަޖީ) ބަޔާނާއި ދަރަނީ އިސްތިރާޖު ބަޔާން ސިއްރިއްޔާތުގައި މަޝްވަރާކުރަން ރައްޔިތުންގެ މަޖިލީހުގައި އެދުމެވެ.

ފިނޭންސް މިނިސްޓްރީން އެދުމުން މި ބަޔާންތައް މަޝްވަރާކުރަން ބާއްވާ ކޮމިޓީ ސިއްރުކުރަން މާލިއްޔަތު ކޮމިޓީން ވަނީ ރުހުންދީފަ އެވެ.

އެހެން ނަމަވެސް މިއީ 2018 އިން ފެށިގެން ގަވާއިދުން ފިނޭންސުގެ ވެބްސައިޓުގައި އެންމެނަށް ފެންނާނެހެން އާންމުކުރަމުން އައި ރިޕޯޓުތަކެއް ކަމުން މި ރިޕޯޓްތައް ސިއްރު ކުރުމާ ގިނަ ބަޔަކު އަންނަނީ ދެކޮޅު ހަދަމުންނެވެ.