ޕްރޮސެކިއުޓަރ ޖެނެރަލްގެ މަގާމުގައި ހުންނަވައިގެން މަސައްކަތްކުރެއްވި ނުފުޒުގައި ނުޖެހި އިންސާފުވެރިކޮށްކަމަށް ހުސެއިން ޝަމީމު ވިދާޅުވުމުން، ޕިއެންއެފްގެ ސެކެރެޓަރީ ޖެނެރަލް މުހައްމަދު މަލީހު ޖަމާލުގެ ވަރުގަދަ ރައްދެއް އަމާޒުކުރައްވައިފިއެވެ.

ދަ ފްރޮންޓް އޮފީހުގައި ބުރާސްފަތި ދުވަހުގެރޭ ކުރިއަށް ގެންދިޔަ ޖަލްސާގައި ވާހަަކަ ދައްކަވަމުން މަލީހު ވަނީ، ރާއްޖޭގެ ޕީޖީގެ އޮފީހަކީ ފައިވް ސްޓަރ ފެންވަރުގެ މުއައްސަސާއަކަށް ހެއްދެވުމަށް ކަމަށް ވިދާޅުވި ވިދާޅުވުމަށް އިޝާރާތްކުރައްވާފައެވެ.

މަލީހު ވިދާޅުވީ، ޝަމީމުގެ އެ ވާހަކަތަކާ ގުޅިގެން ހައިރާންވެވަޑައިގަންނަވާ ކަމަށާ، ޝަމީމު ޕީޖީކަމުގައި ހުންނަވައިގެން ކުރެއްވި ހާ ވެސް ކަމަކީ އަދުލު އިންސާފުގެ ދާއިރާ ޚަރާބުކޮށް ރައީސް ޔާމީނަށް ސެލެކްޓިވް ޖަސްޓިސެއްގެ ތެރެއިން އަނިޔާވެރިވުމަށް ކަމަށެވެ.

މަލީހު މިފަދައިން ވިދާޅުވެފައިވާއިރު، އެމްޑީއެން ޝަމީމު ވަނީ އެމްއެމްޕިއާރުސީގެ މައްސަލަިއގައި ހަމަ އެކަނި ރައީސް ޔާމީންގެ މައްޗަށް ދައުވާ ކޮށް ޝަރީއަތްތައް ހިންގާ ނުހައްގު ހުކުމްވެސް ކޮށްފައެވެ. އަދި ކޯޓުގައި ހުރި އެމްއެމްޕީއާރުސީ ޚިޔާނާތާ ގުޅުން ހުރި ބައެއް މައްސަލަތައް އަނބުރާ ގެނެސްފައިވެއެވެ. އެގޮތުން ރައްޔިތުންގެ މަޖިލީހުގެ އިދާރާގެ ބިއުރޯ ޗީފަކަށް ރައްޔިތުންގެ މަޖިލީހުގެ ކުރީގެ މެމްބަރު އަހުމަދު ނިހާން ހުސައިން މަނިކު، ރައްޔިތުންގެ މަޖިލީހުގެ ރައީސް ޢަބްދުއްރަޙީމް ޢަބްދުالله އައްޔަނުކުރައްވިކަން އިއުލާންކުރެއްވިތާ މާގިނަ އިރުތަކެއް ނުވެ، ޕީޖީއިން އޭނާގެ މައްޗަށް ކޮށްފައިވާ ދައުވާތައް އަނބުރާ ގެންގޮސްފައިވެއެވެ.

ޕީޖީއިން ވަނީ ނިހާންގެ މައްޗަށް 2019 ވަނަ އަހަރުގައި ކޮށްފައިވާ ރިޝްވަތަށް އެދުމުގެ ދެ ދައުވާއަކާއި ރިޝްވަތު ހިފުމުގެ ތިން ދައުވާއެއްގެ އިތުރުން މަނީލޯންޑްރިންގެ ދައުވާ ވެސް އަނބުރާ ގެންގޮސްފައެވެ.

މިފަދަ ނިންމުމެއް ޕީޖީއިން ނިންމާފައިވަނީ ރައީސް އަބްދުﷲ ޔާމީންގެ މައްޗަށް ގއ. ވޮޑެމުލާ މައްސަލައިގައި ދަށު ކޯޓުން ކުރި ހުކުމުގެ އިސްތިއުނާފުގެ މައްސަލާގައި 2021 ވަނަ އަހަރު ސުޕްރީމް ކޯޓުން ކުރި ހުކުމަށް ރިއާޔަތްކޮށް ބެލިއިރު، ނިހާންގެ މައްޗަށް އެ ދައުވާ ސާބިތުވާނެ ކަމަށް ނުބެލެވޭތީ ކަމަށް ބުނެ ކަމަށް ވެއެވެ.

ނަމަވެސް އެ ހުކުމް އެހެން ކޮށްފައިވަނިކޮށް ރައީސް ޔާމީންގެ މައްޗަށް އެ ހުކުމުގައި ބުނެފައިވާ "ބަލައި ނުގަނެވޭނެ" ހެކިތަކާ އެކު ދައުވާތައް އުފުލާ ހުކުމްކޮށް އެމަނިކުފާނުގެ އެތައް ހައްގަކަށް އަރައިގެންފައިވެއެވެ.