މިއަދު ހެނދުނު ނ. ހޮޅުދޫގައި މަރާލާފައި އޮއްވާ ފެނުނުކަމަށް ބެލެވޭ އަންހެން މީހާގެ މަރުގެ ތަހުގީގުކުރުމަށް ފުލުހުންގެ ޚާއްސަ ޓީމެއް އެރަށަށް ފުރައިފިއެވެ.

ހޮޅުދޫގައި އުމުރުން 50 އަހަރުގެ އަންހެނަކު ޒަކަމްތަކަކާ އެކު ގެއެއްގެ ތެރޭގައި އޮތްކަމުގެ ރިޕޯޓު ހެނދުނު 10:10 އެހާކަންއިރު ލިބުމުން ފުލުހުން ގޮސް އެ އަންހެން މީހާ އެ ރަށު ސިއްހީ މަރުކަޒަށް ގެންގޮސްފައިވާ ކަމަށާ އެމީހާ ނިޔާވެފައިވާ ކަމަށް ފުލުހުން މީޑިޔާތަކަށް ފޮނުވި މެސެޖެްގައި ހާމަކޮށްފައިވެއެވެ.

އޭގެ ފަހުން އެ މައްސަލައިގެ އަދާ ހަމަ ދެއްވަމުން ފުލުހުން ހާމަކޮށްފައިވާ ގޮތުގައި އެ މައްސަލައިގެ ތަހުގީގަށް ފުލުހުންގެ ހާއްސަ ތަހުގީގު ޓީމެއް މިހާރު ވަނީ ހޮޅުދޫއަށް ފުރާފައެވެ.

މައުލޫމާތު ލިބިފައިވާ ގޮތުގައި އެ އަންހެން މިހާގެ ކަރުގައި ވަޅި އަޅާ ބުރިކޮށްލާފައިވާ ކަމަށާ އަދި ޒަޚަމްތަކާ އެކު ފެނުނުއިރު އަންހެން މީހާގެ ހަށިގަޑު ކައިރީ ވަޅިއެއް އޮތް ކަމަށް ވެއެވެ.

މި މަރުގެ ފަހަތުގައި ވަނީ ކޮންކަމެއްކަމެއް ހާމަވެފައި އަދި ނުވާއިރު ނ. އަތޮޅު މަނަދޫގައި ވެސް އަންހެނަކު އޭނާ ދިރިއުޅެމުން ދިޔަ ގޭތެރޭގައި މަރާލާފައި އޮއްވާ ފެނި ތަހުގީގުކުރުމަށް ފަހު އެކަން ކުރި މީހުންގެ މައްޗަށް މިހާރު ވަނީ ދައުާ އުފުލާ މައްސަލަަ ކޯޓުގައި ފަށާފައެވެ.