މަސްވެރިންނަށް ނުދީ ޕެންޑިންގައި 9 މިލިއަން ރުފިޔާ ހުރިކަން ހާމަވެއްޖެއެވެ.

މިކަން ހާމަވެފައިވަނީ، މޯލްޑިވްސް އިންޑަސްޓްރިއަލް ފިޝަރީޒް ކަމްޕެނީ ލިމިޓެޑް (މިފްކޯ)އިން މީޑިޔާތަކަށް ހާމަކުރި މައުލޫމާތުންނެވެ.

އެގޮތުން ހޯމަ ދުވަހު އެ ކުންފުނިން ހާމަކުރި މައުލޫމާތަށް ބަލާއިރު.، މިދިޔަ މަހުގެ 26 އިން ފެށިގެން މަސްވެރިން ކިރާފައިވާ މަހަށް ދޭން ޖެހޭ ނުވަ މިލިއަން ރުފިޔާ އަދި އޮތީ ނުދެވިއެވެ. އަދި ދޭނެ ގޮތެއްވެސް ނެތެވެ.

އެގޮތުން މިފްކޯއިން އާންމުކުރި ތަފާސް ހިސާބުތަކުން ދައްކާ ގޮތުގައި ނުދެވި ވަނީ ޖުމްލަ 9،155،491.79 ރުފިޔާއެވެ. އެއީ 331 ދޯންޏަކަށް ދޭންޖެހޭ ފައިސާގެ އަދަދެވެ.

އެ ޖުމްލަ އަދަދުގެ ތެރެއިން 3،590،838.62 މިލިއަން ރުފިޔާއަކީ ފެލިވަރަށް ކިރި މަހުން ދައްކަންޖެހޭ ފައިސާއެވެ. 5،451،481.27 ރުފިޔާއަކީ ކޫއްޑޫއަށް މަސް ކިރައި، މިފްކޯއިން ދޭން ޖެހިފައިވާ އަދަދެވެ. 113،171.90 ރުފިޔާއަކީ އައްޑޫއަށް މަސް ކިރުމުން ދޭންހުރި ފައިސާއެވެ.

މިކަމާ ގުޅިގެން މިފްކޯއިން ބުނެފައިވަނީ، ބުނީ މަސްވެރިކަން އިތުރަށް ދަށްވެ އެ ކުންފުނީގެ މާލީ ހާލަތު ހުރިގޮތުން މި ފައިސާ ދެވޭނެ ވަކި ތާރީހެއް ދަންނަވަން ދަތި ކަމަށެވެ. ނަމަވެސް ކުރިން ވެސް ކަންކުރާ ގޮތަށް ސަރުކާރާއެކު މަޝްވަރާކޮށް ގޮތެއް ހޯދުމަށް މަސައްކަތްކުރަމުން އަންނަކަމަށް ވަނީ ބުނެފައެވެ. އަދި އުއްމީދަކީ ވީ އެންމެ އަވަހަށް ނުދެވިވާ ފައިސާ ޚަލާސްކުރުންކަމަށް މިފްކޯއިން ވަނީ ބުނެފައެވެ.

މަސްވެރިންނަށް ނުދެވި ފައިސާ ހުރިކަން މިފްކޯއިން ހާމަކުރި ނަމަވެސް ސަރުކާރުން ބުނަމުން ގެންދަނީ މަސްވެރިންނަށް ދޭން ޖެހޭ ފައިސާ ވާނީ ދީ ޚަލާސްކޮށްފައި ކަމަށެވެ. އެހެންކަމުން ސަރުކާރުގެ ތެރެއިން ދޮގު ހަދަމުންދާކަން މިވަނީ ހާމަވެފައެވެ.