ދައުލަތުގެ ހިސާބުތައް ބެލެހެއްޓުމުގައި ކުރީގެ ރައީސް އިބްރާހިމް މުހައްމަދު ޞާލިހްގެ ސަރުކާރުން ގޯސްތަކެއް ހަދާފައި ހުރުމުން މައްސަލަ ބަލާނެކަމަށް ބުނެ، އަނެއްކާވެސް ކުރީ ސަރުކާރުގެ ބޮލަށް ޖަހައިފި އެވެ.

މިފަދައިން ވިދާޅުވެފައި ވަނީ މިއަދު ރައީސުލްޖުމްހޫރިއްޔާގެ އޮފީހުގައި ކުރިޔަށް ގެންދިޔަ ނޫސްވެރިންގެ ބައްދަލުވުމުގައި ފިނޭންސް މިނިސްޓަރ މޫސާ ޒަމީރު އަދި ބަންޑާރަ ނައިބު އަހުމަދު އުޝާމެވެ.

އެގޮތުން ޒަމީރު ވިދާޅުވީ ޖެހިގެން އުޅޭ މައްސަލައަކީ ކުރީ އަހަރުގެ ހަރަދުތައް ފަހުން ރިކޯޑު ކުރުން ކަމަށެވެ. ޒަމީރު ވިދާޅުވީ މައްސަލަ ޖެހިގެން އުޅެނީ ފަންޑަން ޕްރޮޖެކްޓުތަކެއްގައި ކަމަށެވެ. އެއީ ބޭރުން ފަންޑުކޮށްގެން ކުރިއަށްގެންދިޔަ ޕްރޮޖެކްޓުތަކެއްކަން ފާހަގަކޮށްލެވެއެވެ.

މިއަދުގެ ބައްދަލުވުމުގައި ވާހަކަ ދައްކަވަމުން އުޝާމް ވިދާޅުވީ ހަރަދު ކުރުމަށްފަހު ޖެހިގެން އަންނަ އަހަރުގެ ބަޖެޓުގައި މިދިޔަ ސަރުކާރުން ވަރަށް ގިނަ ހިސާބުތައް ޖަހާފައިވާ ކަމަށެވެ.

އެއީ، ގާނޫނު އަސާސީ އާއި މާލިއްޔަތާ ގުޅޭ ގަވާއިދާ ހިލާފަށް ކުރަމުންދިޔަ ކަމެއް ކަމަށެވެ. އެހެންކަމުން، އެ މައްސަލަތައް ބަލަން ނިންމާފައިވާ ކަމަށް އުޝާމް ވަނީ ވިދާޅުވެފައެވެ.