ނިޔާވެފައިވާ ބައްޕަގެ ނަން ބޭނުންކޮށްގެން ދަރިވަރަކަށް ޓިޗަރަކު ފުރައްސާރަކުރި ކަމަށް ބުނާ މައްސަލައެއް ފެންމަތިވެއްޖެއެވެ.

މި މައްސަލަ ފެންމަތިވެފައިވަނީ ފުވައްމުލަކު ސިޓީގައެވެ.

ފުރައްސަރާ އަމާޒުވި ކުއްޖާގެ އާއިލާގެ ފަރާތުން ފޭސްބުކްގައި ކުރި ޕޯސްޓެއްގައި ބުނެފައިވަނީ ޏ. އަތޮޅު ތައުލީމީ މަރުކަޒުގައި ކިޔަވައިދެމުން ގެންދާ ދިވެހި ޓީޗަރަކު ވަނީ އެއާއިލާގެ ކުއްޖަކަށް ސްކޫލުގައި ވަރަށް ބޮޑަށް ފުރައްސާރަކޮށްފައި ކަމަށެވެ.

އާއިލާގެ ފަރާތުން ހާމަކޮށްފައިވާ ގޮތުގައި އެ ސްކޫލުގައި ދިވެހި މާއްދާ ކިޔަވައިދެމުން ގެންދާ ދިވެހި ޓިޗަރު ވަނީ ދަރިވަރަށް ނިސްބަތްކޮށް "މިއީ މަންމައަކު ބައްޕައަކު ވެސް ނެތް މީހެއް ހެއްޔޭ" ކިޔާ އަދަބު ކުޑަކޮށް ކުއްޖާއާ ވާހަކަ ދައްކާފައި ކަމަށާ އަދި ދަރިވަރުގެ ނިޔާވެފައިވާ ބައްޕަގެ ނަން ގެނެސް އޭނާއަށް ފުން އަސަރުކުރުވާ ގޮތަށް ދަރިވަރާ މުޚާތަބުކޮށްފައިވާ ކަމަށް ބުނެ އާއިލާއިން އެކަން ކުށްވެރިކޮށް ނުރުހުން ފާޅުކޮށްފައިވެއެވެ.

ދަރިވަރުގެ ބައްޕައާ ގުޅުވާ މުދައްރިސު ވާހަކަ ދައްކާތީ އެ ދަރިވަރާ ޖެހިގެން އިން ދަރިވަރު، "މިސް ތިކިޔަނީ ކީކޭ ހެއްޔޭ އޭނާ ބައްޕަ ވަނީ ނިޔާވެފައިކަން މިސްއަށް ނޭނގޭ ހެއްޔޭ" ބުނުމުން "ނޫނެކޭ ތިމަންނަ އަށް އެނގެޔޭ" ބުނެ ވެސް އެ ކުއްޖާއާ މުޚާތަބުކުރަމުން ދިޔަކަމަށްވެސް ޕޯސްޓުގައި ވެއެވެ.

އާއިލާއިން ފަރާތުން، މުދައްރިސްގެ ފޮޓޯވެސް ހިއްސާކޮށް ބުނެފައިވާ ގޮތުގައި ކުއްޖަކު ނުކިޔެވިޔަސް އަދި ބަސް ނޭހިޔަސް ނިޔާވެފައިވާ މައިންބަފައިންނާ ޖާމިނުކޮށް ވާހަކަ ދައްކަން ނުޖެހޭ ކަމަށާ އެ ދަރިވަރަށް ދަރިވަރުގެ ބައްޕައާ ވަކިވާން ޖެހުނުތާ އަދި އަހަރެއްހާ ދުވަސްވެފައިވާއިރު އަދިވެސް އެ ދަރިވަރު ގެންދަނީ އެކަމުގެ ހިތާމައިގައި ވަގުތުތައް ހޭދަ ކުރަމުން ކަމަށްވުމުން ސްކޫލަށްވެސް އެކަން ނޯޓިފައި ކޮށްފައިވީ ނަމަވެސް މުދައްރިސަށް އެކަން އެނގިހުރެ ކުއްޖާއާ އެގޮތަށް މުޚާތަބުކުރުމަކީ ފުރައްސާރަކުރުމުގެ ގޮތުގައި އާއިލާއިން ސިފަކޮށްފައިވެއެވެ.

މުދައްރިސު ތަކުރާރުކޮށް އެކަން ކުރަމުން ދިޔަ ނަމަވެސް ދަރިވަރުގެ ފަރާތުން އެކަން އާއިލާއާ ހިއްސާކޮށްފައިނުވާ ކަމަށާ އެކަން އާއިލާގެ ސަމާލުކަމަށް ގެނައީ އެހެން ދަރިވަރުންނާ ބެލެނިވެރިން ކަމަށެވެ. އަދި އެ މުދައްރިސުގެ އަމަލުތަކާ ބަސްމަގު ހުންނަ ގޮތުން އެ މާއްދާ ކިޔެވުމަށާ އަދި މާއްދާގެ ގަޑީގައި ފިލާވަޅު ހަދަންވެސް ފޫހިވެފައިވާ ކަމަށް އާއިލާއިން ހާމަކޮށްފައިވެއެވެ.

މިކަމާ ގުޅިގެން، އާއިލާއިން ފޮޓޯ ހިއްސާކޮށްފައި މުދައްރިސް ކަމުގައިވާ މައުސޫމާއަށް އޭނާގެ ބަހެއް ހޯދާލަން "ތޭރަ އޮންލައިން"ގެ ފަރާތުން ގުޅާލުމުން ބުނެފައިވަނީ އޭނާގެ އަބުރަކާ އިއްޒަތެއްވެސް އޮންނާނެ ކަމަށާ އެކަމުގައި ބަހެއް ބުނަން ބޭނުން ނުވާ ކަމަށެވެ.

މިކަމުގައި ޏ އަތޮޅު ތައުލީމީ މަރުކަޒުގެ ބަހެއް ހޯދާލަން ޕްރިންސިޕަލްއަށް ގުޅާލުމުން ބުނެފައިވަނީ އެއީ "މިސްއަންޑަރސްޓޭންޑިން"އެއް ކަމަށާ މައުލޫމާތު ދެވޭނީ އެ މިންވަރަށް ކަމަށެވެ.

މިކަމާ ގުޅިގެން އެޑިއުކޭޝަން މިނިސްޓްރީގެ ބަހެއް ހޯދާލަން ގުޅާލުމުން އެޑިއުކޭޝަންގެ މީޑިޔާ އޮފިސަރ ނަޖާ ވިދާޅުވީ ޖެހޭނީ ބަލާލަން ކަމަށެވެ.