ފޭސްބުކްގައި ހުންނަ ސަރުކާރާ ދެކޮޅަށް ޝާއިއުކޮށްފައިވާ ޚަބަރުތައް ރިޕޯޓްކުރަނީ ސަރުކާރަށް ހަޖަމް ނުވެގެންކަން ހާމަވެއްޖެ އެވެ.
ސަރުކާރުން ކުރާ ނޭދެވޭ، ނުރަނގަޅު ކަންކަމުގެ ވާހަކަތައް ރައްޔިތުންނާ ހަމަޔަށް ތިލަކޮށްފައި ގެންނަ ޚަބަރުތައް ފޭސްބުކްގައި ހިއްސާކޮށްފައި ހުރުމުން، ސަރުކާރުން އަންނަނީ ފޭސްބުކް އަށް ރިޕޯޓްކޮށްގެން އެ ޚަބަރު ޕޯސްޓުތައް ނަގަމުންނެވެ.
މިކަން މިގޮތައް ސަރުކާރުން ކުރަނީ ރައްޔިތުންނަށް ކަންކަން އޮޅުވާލާ ސިއްރުކުރުމުގެ ބޭނުމުގައެވެ. މިއަދު ވެސް "ތޭރަ އޮންލައިން" އިން ޝާއިއުކޮށްފައިވާ " ބަޖެޓުން ހަރަދުކުރި ގޮތުގެ ތަފުސީލު ކޮމިޓީއަށް ވެސް ސިއްރުކޮށްފި" މި ޚަބަރު ފޭސްބުކް އިން ވަނީ ނަގާފައެވެ.
ނޫސްވެރިންނަކީ ޑިމޮކްރެސީގެ ހަތަރު ވަނަ ބާރު ކަމަށާ ނޫސްވެރިންނަށް އެންމެ މިނިވަންކަމާ އެކު މަސައްކަތްކުރުމުގެ ޖާގަ ދޭނީ މިސަރުކާރުން ކަމަށް ރައީސް މުއިއްޒު ހުވާކުރެވުމަށް ފަހު ބޭއްވި ނޫސްވެރިންގެ ގުންޒަރުގައި ވިދާޅުވެފައިވެއެވެ.
އެހެންނަމަވެސް ވެރިކަމުގެ ދުވަސްތައް ހިނގަން ފެށުމާއެކު ސަރުކާރު ޖަވާބުދާރީ ކުރުވަން މަސައްކަތްކުރާ ނޫސްތަކާ މެދު ފިޔަވަޅު އަޅަން ސަރުކާރުން މަސައްކަތް ފަށާފައިވެއެވެ. އަދި ސަރުކާރުގެ ތެރެއިން ފޯރުކޮށްދޭން ޖެހޭ މައުލޫމާތު ފޯރުކޮށްދިނުމުގައި ރައީސް އޮފީހުގެ ތަރުޖަމާނު ހީނާ ވަލިދު އާ އަދި އިސްވެރިންވެސް ތަފާތުކުރުން ގެންގުޅޭކަން ފާހަގަކޮށްލެވެއެވެ.
