ހަޔާތުގެ ހިތްދަތި އަދި އުނދަގޫ ދުވަސްތަކެއް ތަހައްމަލު ކުރަން ޖެހުމަކީ އެއްވެސް މީހަކަށް ފަސޭހަ ކަމަކަށް ނުވާނެކަން ޔަގީނެވެ. އަދި ޚާއްސަކޮށް ކުށެއް ނެތި އަނިޔާ ތަހައްމަލު ކުރަން ޖެހުމަކީ އެއީ އަދި މާ ހިތްދަތިކަމެކެވެ. އެކަމުގެ ހުރި ވޭނާ އުނދަގޫ އެނގޭނީ ހަމަ އެކަމެއް ތަހައްމަލު ކުރި މީހަކަށެވެ.

އެގޮތުން ބަލާއިރު އެފަދަ ހިތްދަތިކަމެއް ތަހައްމަލުކޮށް ނަމަވެސް ހިތްވަރު ދެއްކެވި އެއް ބޭފުޅަކީ ރައީސް އަބްދުﷲ ޔާމީނެވެ. އެމަނިކުފާނަށް ނުހައްގުން ކުރި ހުކުމްތަކާއެކު ޖަލުގެ ތޭރިތަކުގެ ފަހަތުގައި ހުރަގޭގައި ގިނިކަންޏާ އިންނަވާ ތަހައްމަލު ކުރެއްވި ބޭއިންސާފުވެރިކަން އެއީ އޭގެ ބަދަލުވެސް ލިބޭނެ އެއްޗެއް ނޫނެވެ. ޖިސްމާނީ ގޮތުން ގެއްލުމެއް ފެންނަން ނެތް ނަމަވެސް ނަފްސާނީ ގޮތުން އެމަނިކުފާނާ އާއިލާ ތަހައްމަލު ކުރި ގެއްލުންތަކަކީ މުޅި އުމުރުގައި އެ ހަނދާންތަކާ އަދި އެކަމުގެ އަސަރު ނުފިލާ ހުންނާނެކަމެކެވެ.

ސިޔާސީ ގޮތުން އެމަނިކުފާނަކީ ގައުމުގައި ރައްޔިތުންގެ ލޯތްބާ މަގްބޫލުކަން ހޯއްދެވި ބޭފުޅަކަށްވުމުން އެމަނިކުފާނު ސިޔާސީ މައިދާނުން އެއްފަރާތްކުރުމަށް ސިޔާސީ ގޮތުން އެމަނިކުފާނުގެ އެތައް ވާދަވެރިންނެއް އެއް ގަލަކަށް އަރާ އެމަނިކުފާނު ޖަލަށްލި ނަމަވެސް އެމަނިކުފާނުގެ މައުސޫމުކަން ސާބިތުވެގެން ދިޔައީ ކޮންމެ ފަހަރަކުވެސް ކޯޓުންނެވެ. އެންމެ މަތީ ކޯޓުތަކުގައ އެމަނިކުފާނުގެ މައުސޫމުކަން ސާބިތުވެ ހުކުމުތަކުން ބަރީއަވެވަޑައިގެން ނުކުންނަވަނީ މި ހަށީގައި ފުރާނަ ހުރިހާ ދުވަހަކު މިއަޑެއް ކަނޑުވައި ނުލެވޭނެ ކަމަށް ވިދާޅުވަމުންނެވެ.

ރައީސް ޔާމީން ޖަލަށް ލެވިދާނެ ކަމަށާ ރައީސް ޔާމީނަށް އަނިޔާވެސް ދެވިދާނެކަމަށް ވިދާޅުވަމުން ދެން ހަމަ އޭގެ ފަަހަތުން ވިދާޅުވި ބަސްފުޅަކީ ތެދެއްކަން މިހާރުވެސް މިދަނީ ހާމަވަމުނެވެ. ތެދެކެވެ. ރައީސް ޔާމީން ޖަލަށްލިއެވެ. އަދި އޭގެ ފަހުން އެމަނިކުފާނުގެ ސިޔާސީ ޝަޚްސު ވިއްކައިގެން ވެރިކަމަށް އައި މީހުންވެސް އެމަނިކުފާނާ މެދު ކަންކުރި އިހާނެތި ގޮތާއެކުވެސް އެމަނިކުފާނުގެ ފިކުރު ނައްތައެއް ނުލެވުނެވެ.

ހެއްކަކީ ޕީޕަލްސް ނެޝަނަލް ފްރޮންޓް (ޕީއެންއެފް)އެވެ. މަކަރުވެރިކަމާ ހިޔަޅުވެރިކަމާ އެކު ދޭން ފެށި އަނިޔާ އެމަނިކުފާނަށް ފަހުމުވެވަޑައިގެން ޕީޕީއެމް ދޫކުރައްވާ ނުކުމެވަޑައިގެން ދޫނުދެއްވާ ހަ ގިޔަރު ކުރިއަށް ޖައްސަވާ އެޅުއްވީ އައު ފިޔަވަޅެކެެވެ. އައު ސިޔާސީ ޕާޓިއެއްގެ ބިންގާ އެޅުއްވީވެސް ނުހައްގުން ހުކުމުގައި ހުންނަވާއެވެ.

އޭގެ ފަހުން ދެން ރައީސް ޔާމީންގެ ފަރާތްޕުޅުން ފެނިގެން ދިޔަ އެންމެ ސަޅި ކަމަކީ ތަފާތު ޚިޔާލުތައް ބަލައިގަތުމުގެ ރީތި މިސާލެވެ. އެމަނިކުފާނަށް އެންމެ ބޮޑަށް ފާޑުކިޔާ، އެންމެ ބޮޑަށް އެމަނިކުފާނަށް ހަޖޫ ޖެހި ޓީވީ ސްޓޭޝަނަކަށް ބަސްދީގަތުމެއް ދެއްވާ އަނެއްކާވެސް އެމަނިކުފާނު ހެއްދެވީ ރެކޯޑެކެވެ. ފިކުރު ތަފާތު ނަމަވެސް އިހުތިރާމަކީ އޮންނަން ޖެހޭ އެއްޗެއްކަން ސާބިތުކޮށްދެއްވާ ރައީސް ޔާމީން، ޖަލުން ނުކުމެވަޑައިގަތުމަށް ފަހު އެންމެ ފުރަތަމަ ބަސްދީ ގަތުން ރާއްޖެ ޓީވީއަށް ދެއްވާ ހިސްޓްރީ މޭކް ކުރެއްވި ނަމަވެސް އެމަނިކުފާނު ދެއްވި އެ ބަސްދީގަތުން ވެގެން ދިޔައީ ޖަލުގެ ހިތި ހަނދާންތައް މާޒީއަށް ދޫކޮށްލައްވާ ފެއްޓެވީ އައު ސަފްޙާ އަކަށެވެ.

ޖަލުގެ ތަޖުރިބާ ހިއްސާކުރައްވާ އެއްޗެއް ވިދާޅުވާން ޕްރެޒެންޓަރު ދެއްވި ފުރުސަތާ އެކު އެމަނިކުފާނު ވިދާޅުވި ބަސްފުޅު ވެގެން ދިޔައީ އެންމެންނަށްވެސް "ސަޕްރައިޒް" އަކަށެވެ. އެގޮތުން އެމަނިކުފާނު ވިދާޅުވީ، "އެއީ ހަމަ އަޅުގަޑު ރައިޓް އޯފް ކުރައްވާކަމެއް. އެއީ ދެން ބޭނުންކަމެއް ނޫން ދެއްތޯ! މާޒީގެ ހިތިކަމާ އެކީ އުޅޭކަމުގައި ވަންޏާ މުސްތަގުބަލެއް ނޯންނާނެ ދެއްތޯ!" މިއެވެ.

މިހާ ހިސާބުން ހިތަށް ހަމަ އެރީ މިއީ ހާދަހާވާ ހިތްވަރުގަދަ ސާބިތު ލީޑަރެކޭއެވެ. އެ ވިދާޅުވުމަށް ފަހު ދެން އެމަނިކުފާނު އިއްޔެ އިއުލާނުކުރެއްވީ ދިވެހި އެތައް ރައްޔިތުންގެ ހިތުގެ އަޑެވެ. އާދޭހެވެ. 2028 ގައި ރިޔާސީ އިންތިހާބަށް ނިކުންނަވާނެ ކަމެވެ. މި ސަރުކާރުން އެމަނިކުފާނަށް ސިޔާސީ ހުކުމެއްކޮށް ބަންދުނުކުރާނަމަ އެއީ ޝައްކެއްވެސް ނެތް ކަމެއް ކަމަށް އެމަނިކުފާނު ވިދާޅުވިއެވެ.

އޭގެ ބޭނުން އެމަނިކުފާނު ވިދާޅުވެ ދެއްވެމުން ހިތަށް އެރީ ނޫނޭ ވާ މިއީ ހަމަ މި ޖީލުގެ މުހައްމަދު ތަކުރުފާނޭއެވެ. މިއީ ހަމަ މި ޖީލުގެ ދޮންބަންޑާރައިންނޭއެވެ. މިއީ ހަމަ މި ޖީލުގެ އަލި ރަސްގެފާނޭއޭއެވެ. އެއީ އެމަނިކުފާނު ވެރިކަމަށް ވަޑައިގެން ކުރައްވަން ބޭނުންފުޅު އެންމެ މައިގަނޑު ތިން ކަމުގެ ތެރޭގައި ނަމުން ބޮޑުބޭބެ ނަމަވެސް ކަމުން ލޯނުތަކުގެ ވާފަށްތަކަކުން ބަނދެ ރާއްޖެ އަޅުވެތިކޮށްފައިވާ އިންޑިއާގެ ކިބައިން ގައުމު ސަލާމަތްކުރުން ހިމެނުމާ އަދި ދިވެހިންގެ ގެއްލިފައި ތަރިކައެއް ކަމަށްވާ "ޗާގޯސް" (ގެއްލުނު ކަނޑު)ގެ ސަރަހައްދުވެސް ހޯދުން ހިމެނޭތީއެވެ. މިހާ ހިސާބުންވެސް އެމަނިކުފާނު، މި ގައުމުގެ މިނިވަންކަމާ އިސްތިގުލާލު އަދި ސިޔާދަތަށް ދެއްވާ އަހައްމިއްޔަތު ހާމަވެއެވެ.

އެހެންކަމުން ނުހައްގުން ލިބުނު އެތައް ހިތްދަތިކަމާ އަނިޔާ އަދި ބޭއިންސާފުން ނެއްޓި ވަޑައިގެން ފަހަތަށް ބެއްލެވުމެއް ނެތި ރައީސް ޔާމީން މިއެޅުއްވީ "ސަޅި" ފިޔަވަޅުފުޅެކެވެ. ޖަލުގެ ހިތި ހަނދާންތައް މާޒީއަށް ދޫކޮށްލައްވާ ރައީސް ޔާމީން މި ފެއްޓެވީ އައު ސަފްޙާއެއްކަން ޔަގީނެވެ. މިކަމުންވެސް ރައީސް ޔާމީންގެ ގަޓުކަމާ އެމަނިފާނުގެ އަޒުމު ގުޑުވާލެވޭނެ ވަރު ސިޔާސީ ބަޔަކު ގައުމުގައި ނެތްކަން ހާމަވެއްޖެއެވެ. ތިޔަ ދައްކަވާ ހިތްވަރަށް އައްސަރި ބަހާ ސާބަހެވެ. އުއްމީދަކީ އުޖާލާ ޒަމާނެއް މި ދީބަށް ފެނުމެވެ. އުއްމީދަކީ އުފާވެރި ހަޔާތެއްގެ ދަންމަރު ދިއްލާލަ ދެއްވާ ނަފާވެރިކަން ދިވެހި ދީބަށް ގެނެސް ދެއްވުމެވެ. އުއްމީދަކީ ޒުވާނުން ތުރާލުން ސަލާމަތްކޮށްދެއްވާ ޒުވާނުންގެ ބައިވެރިވުމާއެކު ވަޒީފާގެ ދޮރުތައް ހުޅުވާ ދެއްވާ ހަގީގީ ދިރިއުޅުން ހިތްތަކަށް ހޯއްދަވާ ދެއްވުމެވެ. އުއްމީދަކީ އަމާން މަގުތަކެއްގައި ކަތުންނަށް ހިނގިޔަ ދެއްވުމަށް މަގުތައް ފަހިކޮށްދެއްވުމެވެ. މިހުރިހާ އުއްމީދެއް މިކުރަނީ އުއްމީދެއް އޮތިއްޔާ ދިރުމެއް ވާނެކަން ޔަގީން ކުރާތީއެވެ. އެހެނީ ނިންމުން ކަތުން އިރާދަކުރެއްވިއްޔާ ނިންމާނީ 2028 އަށް "ޔާމީން" ކަން ޔަގީންކުރަމުން ކަމަށްވާތީއެވެ.