.ނ. ހޮޅުދޫގައި ސެޕްޓެމްބަރު މަހުގެ 10 ވަނަ ދުވަހު ޒަޚަމްތަކަކާއެކު މަރުވެފައި އޮއްވާ ފެނުނު ޒަކިއްޔާ މޫސާގެ މަރުގެ ތަހުގީގު ލަސްކުރަމުން ގެންދާތީ އެކަމާ ދެކޮޅަށް އަޑު އުފުލުމަށް އެ ރަށު ރައްޔިތުން ނިކުންނަން ނިންމައިފިއެވެ.

ޒަކިއްޔާ މަރުވެފައިވަނީ އަމިއްލައަށް ކަމަށް އަޑު ފެތުރު ނަމަވެސް އެހެން އެކަން ނުނިންމާކަމަށް ފުލުހުން ހާމަކޮށްފައިވެއެވެ. ނަމަވެސް ޒަކިއްޔާގެ ހަށިގަޑުގެ އޮޓޮޕްސީ ނުހަދާ ވަނި ދޫކޮށްލާފައެވެ. ނުހެދީ ހަދަން ޖެހޭ އިތުރު ސަބަބެއް ފާހަގަނުވާތީކަމަށް ފުލުހުން ހާމަކޮށްފައިވެއެވެ.

ޒަކިއްޔާގެ މަރު ތަހުގީގަށް މާލެއިން ޚާއްސަ ޓިމެއް ހޮޅުދޫއަށް ދިޔަ ނަމަވެސް ފުލުހުން އޭރު ބުނެފައިވަނީ، މައްސަލައަކީ ތަހުގީގު ކުރިއަށްދާ މައްސަލައަކަށްވުމުން އިތުރު ތަފްސީލް ހާމަކުރެވެން ނެތް ކަމަށެވެ. އޭގެ ފަހުންވެސް ދެ މަސް ފާއިތުވެފައިވާއިރުވެސް ފުލުހުން މި މަރުގެ އިތުރު ތަފްސީލެއް ނުވަތަ މައުލުމާތެއް މީޑިޔާއާ ހިއްސާކޮށްފައިނުވެއެވެ.

ޒަކިއްޔާގެ މަރާ ގުޅިގެން މާދަމާ ހަވީރު 4:15ގައި އެރަށު ބޯޅަދަނޑުގައި ވަނީ އެއްވުމެއް ބާއްވަން ނިންމާފައެވެ. މައުލޫމާތު ލިބިފައިވާ ގޮތުގައި އެއްވުން ބާއްވާ ރަށުގެ މަގުތަކަށް ނިކުތުމަށް ރައްޔިތުން ނިންމާފައިވަނީ ޒަކިއްޔާ މަރުވީ އަމިއްލައަށް ނޫން ކަމަށް ގަބޫލުކުރެވޭތީ އެކަމާ ގުޅުން ހުރި ޝުއޫރުތައް ފާޅުކުރުމަށާ މައްސަލައިގައި ތަހުގީގު ލަސްވާތީއާވެސް އެކުގައެވެ.

މައުލޫމާތު ލިބިފައިވާ ގޮތުގައި ޒަކިއްޔާގެ ވައިނޮޅިގައި ވަޅި އަޅާ ވަނީ ބުރިކޮށްލާފައެވެ. އަދި އޭނާ މަރުވެފައި އޮތްއިރު ކައިރީގައި ވަޅިއެއްވެސް އޮތް ކަމަށް ވެއެވެ.