ބައިނަލްއަގުވާމީ ކްރެޓިޑް ރޭޓިން އޭޖެންސީ މޫޑީސްއިން ރާއްޖޭގެ މާލީ ހާލަތާ ގުޅިގެން ފާހަގަކޮށްފައިވާ ނުރައްކާތައް ކުޑަ ކުރުމުގެ ގޮތުން،  ސަރުކާރުން އަޅުއްވަން ޖެހިވަޑައިގަންނަވާ ފިޔަވަޅުތައް އަޅުއްވާނެކަމުގެ ޔަގީންކަން ފިނޭންސް މިނިސްޓްރީން ދެއްވުމާއި ގުޅިގެން ގިނަ ބަޔެއްގެ ފާޑު ކިޔުން އަމާޒުވެއްޖެއެވެ.

މި ގޮތުން، ރައީސް ޑރ މުހައްމަދު މުއިއްޒުގެ ވެރިކަމަށް އަހަރެއް ފުރި ދެވަނަ އަހަރު ގުނަމުން ދާއިރު އަބަދުވެސް ދައްކަވަމުން ގެންދަވަނީ ކަންތައްތައް ރަނގަޅު ކުރާނެ ކަމުގެ ޔަގީން ކަމަަށްވާއިރު މިއިން އެއްވެސް ކަމެއްގެ އަމަލީ މަސައްކަތެއް ކުރައްވާ ތަނެއް މިހާތަނަށް ފެނިފައިނުވާ ކަމަށް ގިނަ ފަރާތްތަކުން އަންނަނީ ބުނަމުންނެވެ.

ފިނޭންސް މިނިސްޓްރީން ރޭ ނެރުނު ބަޔާނެއްގައި ބުނީ މޫޑީސްއިން އަލިއަޅުވާލާފައިވާ ނުރައްކާތައް ކުޑަކުރުމަށްޓަކައި ފިޔަވަޅުތަކެއް ތަންފީޒުކުރާނެކަމުގެ ޔަގީންކަން ސަރުކާރުން ދޭ ކަމަށެވެ.

އަދި ސަރުކާރުގެ އިގްތިސާދީ ރިފޯމް އެޖެންޑާގެ ދަށުން އިގުތިސާދު ފުޅާވެ، މާލީ ގޮތުންނާއި ދަރަނި އަދާކުރުމުގެ ދެމެހެއްޓެނިވިކަން ގާއިމް ކުރެވޭނެ ކަމަށް ބުނެފައިވެއެވެ.

މޫޑީސް އިން ރާއްޖޭގެ އިގްތިސާދީ ހާލަތާއި ގުޅިގެން ނުރައްކާ އޮތް ކަމަށް ހާމަކޮށްފައިވާތާ ދުވަސްކޮޅެއް ވެފައިވާއިރު އަދިވެސް މި ހާލަތު ރަނގަޅު ކުރުމަށް ސަރުކާރުން އެދެވޭ އެއްވެސް މަސައްކަތެއް ކޮށްފައި ނުވެއެވެ.

އޭގެ ބަދަލުގައި ފެނިގެން ދަނީ ބޭކާރު ހަރަދުތައް އިތުރުވެ، ދައުލަތުގެ ބަޖެޓް މެނޭޖް ކުރަން އެގިވަޑައިނުގަންނަވާ މަންޒަރެވެ.

ގައުމުގެ ދަރިނިވެރިކަން ހައްލުކުރުމަށް ބޮޑެތި ޕްލޭންތައް ހައްދަވާ ވެރިކަމަށް ވަޑައިގެން ސަރުކާރުން ހެއްދެވިހާ ޕްލޭންއެއް ވަނީ ހިންގަން ނޭގި ފްލޮޕްވެގެން ގޮސްފަ އެވެ. ޑޮލަރަށް ވިޔަފާރިވެރިންޖެހި ތަކެތީގެ އަގު ބޮޑުވެ ރައްޔިތުންގެ އަސާސީ ކާބޯތަކެތި ވަނީ އުފުލިފަ އެވެ.