ރަސްމީ ދަތުރުފަތުރަށް ކަނޑައެޅި ބަޖެޓަށް ވުރެ އިތުރަށްވެސް ދައުލަތުން ޚަރަދުކޮށްފިއެވެ.

ދައުލަތުގެ ތަފާސް ހިސާބުތައް އާންމުނުކޮށް ހިފަހައްޓާތާ ޒަމާންތަކަކަށް ފަހު ފިނޭންސް މިނިސްޓްރީއިން އާންމުކުރި ތަފާސް ހިސާބުތަކުން ދައްކާގޮތުގައި މި އަހަރަށް ފާސްކުރި ބަޖެޓުގައި ކަނޑައަޅާފައި އަދަދަށްވުރެ 16.7 މިލިއަން އިތުރަށް ވަނީ ހަރަދުކޮށްފައެވެ. ހިސާބުތައް ދައްކާ ގޮތުން ނޮވެމްބަރު 28، ގެ ނިޔަލަށް ދަތުރުފަތުރަށް ދައުލަތުން ހޭދަކޮށްފައިވަނީ ޖުމްލަ 245 މިލިއަން ރުފިޔާއެވެ.

އެހެންކަމުން މިއީ ރައްޔިތުންގެ މަޖިލީހުން މި އަހަރަށް ފާސްކުރި ބަޖެޓުގައި ދަތުރުފަތުރަށް ކަނޑައަޅާފައި އޮތް 228.3 މިލިއަން ރުފިޔާއަށް ވުރެ 16.7 މިލިއަން އިތުރު އަދަދެކެވެ.

ދަތުރުފަތުރަށް ކަނޑއެޅި މިންވަރަށްވުރެ އިތުރަށް ދައުލަތުން ޚަރަދުކޮށްފައި މިވަނީ މި އަހަރު މަޖިލީހުން ފާސްކުރީ ފަސް ބިލިއަނުގެ ސަޕްލިމެންޓަރީ ބަޖެޓުގައި ވެސް ދަތުރުފަތުރަށް އިތުރު ފައިސާއެއް ހިމަނާފައި ވެސް ނުވާއިރުގައިކަން ފާހަގަކޮށްލެވެއެވެ.

ދަތުރުފަތުރަށް ކަނޑއެޅި މިންވަރަށް ވުރެ އިތުރަށް ދައުލަތުން ޚަރަދުކޮށްފައިވާއިރު، ރައީސް މުހައްމަދު މުއިއްޒު ވަނީ މަޖިލިސް އިންތިހާބާ ދިމާކޮށްވެސް ރަސްމީ ދަތުރުފުޅުތަކުގެ ނަމުގައި ކެމްޕެއިން އެތައް ދަތުރެއް ކުރައްވާފައެވެ. އަދި ރާއްޖޭއިން ބޭރަށް ވެސް ގިނަ ދަތުރުތަކެއް ކުރައްވާފައިވެއެވެ. އޭގެތެރޭގައި ޗައިނާ، އެމެރިކާ، އިންޑިއާ، އެކުވެރި އަރަބި އިމާރާތް، ސައުދީ އަރަބިއާ، އަޒަރުބައިޖާން އަދި އެންޓީގާ އެންޑް ބާބިޔުޑާ އަށްވެސް އެމަނިކުފާނު ވަނީ ވަޑައިގެންފައެވެ. މިއިން ކޮންމެ ގިނަ ދަތުރުފުޅުތަކުގައި އަނބިކަނބަލުން ސާޖިދާ މުހައްމަދުގެ އިތުރުން ކަމާ ގުޅުން ނުވެސް ނެތް ބޮޑު ވަފްދުތަކެއް ބައިވެރިކުރުވާފައިވެއެވެ.