ދައުލަތުގެ މާލީ ހާލަތު ރަނގަޅު ކުުރުމަށްޓަކައި އިސްލާހީ ފިޔަވަޅުތައް އެޅުމުގެ މަސައްކަތަށް ހާއްސަކޮށްފައިވާ ކޮމިޝަނާ އޮފް ރިފޯމް އަކަށް، މީރާގައި އިސް މަގާމުތައް ފުރުއްވާފައިވާ އަސްމާ ޝަފީއު ހަމަޖައްސައިފި އެވެ.

އަސްމާ މީގެ ކުރިން މަސައްކަތް ކުރައްވާފައިވަނީ މީރާގެ ޑެޕިއުޓީ ކޮމިޝަނަރު ޖެނެރަލްގެ މަގާމުގަ އެވެ. އެ މަގާމަށް އޭނާ އައްޔަންކުރެވުނީ 2019 ގަ އެވެ.

އެ މަގާމުން އަސްމާ ވަކިވެފައިވަނީ މިދިޔަ އަހަރުގެ ނޮވެމްބަރު 31 ގައި އޭނާގެ ދައުރު ހަމަވުމުންނެވެ.

ކޮމިޝަނާ އޮފް ރިފޯމް މަގާމުގެ ޒިންމާތައް ކަމުގައި ބުނެފައިވަނީ އިގުތިސާދީ އަދި އެސްއޯއީ އަދި މާލީ އިސްލާހުތައް ތަންފީޒުކުރުމަށް ސަރުކާރުން އެކުލަވާލާފައިވާ ނޭޝަނަލް ރިފޯމް އެޖެންޑާ އެކުލަވައިލާ ތަންފީޒުކުރުމެވެ.

އަދި އިސްތިރާޖީ އެޑްވައިސް ދިނުމާއި އަޅަންވީ ފިޔަވަޅުތައް ފިނޭންސް މިނިސްޓްރީއަށް ބުނެދިނުމަކީވެސް ޒިންމާއެއް ކަމުގައި ބަޔާންކޮށްފައިވެ އެވެ.

ކޮމިޝަނާ އޮފް ރިފޯމްއަށް ލިބިވަޑައިގަންނަވާ މުސާރަ އާއި އިނާޔަތްތައް ސަރުކާރުން ހާމަކޮށްފައެއް ނުވެ އެވެ.

ރާއްޖޭގެ މާލީ ހާލަތު ގޯސްވުމުގެ ސަބަބުން ގިނަ ދާއިރާތައް ރިފޯމް ކުރުމުގެ މަސައްކަތް ސަރުކާރުން ވަނީ ފަށައިފަ އެވެ.

އެގޮތުން، ސަބްސިޑީކެނޑުމާއިމާއި، އާސަންދަ ލިމިޓް ކުރުމުގެ އިތުރުން އެއް މަސައްކަތެއް ކުރާ މުއައްސަސާތައް އެއް ކުރުމުގެ މަސައްކަތް ވެސް މިސަރުކާރުން މިހާރު ވަނީ ފަށައިފަ އެވެ.