ރާއްޖެއަށް މުދާ އެތެރެކުރުމަށް ވަގު ޓެލެގްރަފިކް ޓްރާންސްފާ (ޓީޓީ) ހެދި މައްސަލާގައި ހައްޔަރުކޮށްފައި ހުރުމަށް ފަހު، މުޖުތަމައަށް ނުރައްކަލެއް ނެތް ކަމަށް ބުނެ ކްރިމިނަލް ކޯޓުން ދޫކޮށްލި ހުސައިން ޝިފާއު އަނެއްކާވެސް ވަގު ޓީޓީ ހަދަން ފަށައިފިއެވެ.

މިފަހަރު އޭނާ ސްކޭމްކޮށްފައިވަނީ ޗައިނާގެ ސަޕްލަޔާރ ކުންފުންޏެއްކަމަށްވާ ޖިނިން ރިޗް ފާރމާރ އިންޓަރނޭޝަނަލް ޓްރޭޑް ކޯ ލިމިޓެޑެވެ. މީގެ އިތުރުންވެސް ބައިވަރު ފަރާތްތަކަށް އޭނާ ވަނީ އޮޅުވަލައިފައެވެ.

ނަމަވެސް އޭނާގެ ސަބަބުން މުޖްތަމައަށް އެއްވެސް ނުރައްކަލެއް ނޯންނާނެކަމަށް ބުނެ އޭނާ ބަންދުން ދޫކުރުމުން އަނެއްކާވެސް އޭނާ މިވަނީ އެކި ފަރާތްތަކަށް އޮޅުވާލަން ފަށާފައެވެ. އެއްވެސް އިދާރާއަކުން ޝިފާއު ހައްޔަރުކުރުމުގައި އުޅުއްވާ މަންޒަރު ނުފެންނާތީ ގިނަ އަދަދެއްގެ ފަރާތްތަކުން އަންނަނީ ކަންބޮޑުވުން ފާޅުކުރަމުންނެވެ.

މިދިޔަ އަހަރުގެ މެއި މަހު އޭނާ ކްރިމިނަލް ކޯޓުން ދޫކޮށްލާފައިވާއިރު އޭނާ ރާއްޖެ އިން ފިލިކަމުގެ އަޑުތަކެއްވެސް ސޯޝަލް މީޑިޔާގައި ވަނީ ފެތުރިފައެވެ.

ޝިފާއު ރާއްޖޭން ބޭރަށް ފިލައިގެން ދިޔަކަން ޔަގީންވެފައިވަނީ، އޭނާ ދޫކޮށްލުމުން ދައުލަތުން އެ މައްސަލަ ހައިކޯޓުގައި އިސްތިއުނާފު ކުރުމުން ކަމަށް ދައުލަތުގެ ވަކީލެއް ވަނީ ކަށަވަރުކޮށްފައެވެ.

ހުސެއިން ޝިފާއުއަކީ ޑޮލަރު ދޭނެކަމަށް ބުނެ މަކަރާއި ހީލަތުން ފައިސާ ހޯދައި އެ ފައިސާ ނުދީ ފިލައިގެން އުޅޭކަމަށް ތުހުމަތުކުރެވޭ މައްސަލައެއްގެ ތަހުގީގަށް ހާޒިރު ކުރަން ބޭނުންވެގެން ކުރިން ފުލުހުން އިއުލާންވެސް ކޮށްފައިވާ މީހެއްކަން ފާހަގަކޮށްލެވެއެވެ.

2021 ވަނަ އަހަރު ފުލުހުން އޭނާ ހޯދަން އިއުލާންކޮށްފައިވާއިރު މިމައްސަލާގައި އޭނާގެ މައްޗަށް ޕީޖީން ވަނީ ބޮޑެތި ދައުވާތަކެއް ވެސް އުފުލާފައެވެ.

މުޖްތަމައުއަށް ނުރައްކަލެއް ނެތްކަމަށް ބުނެ ޝިފާއު ދޫކޮށްލުމުން ގިނަ ފަރާތްތަކުން އަންނަނީ ޕީޖީ އޮފީހަށް ފާޑުކިޔަމުންނެވެ.