ޑިޕާޓުމަންޓު އޮފް ނޭޝަަނަލް ރެޖިސްޓްރޭޝަން (ޑީއެންއާރު)އިން މައުލޫމާތު ހޯދަން އެދުމުން އެ މައުލޫމާތު ހިއްސާކުރާނެ ކަމަށާ އެއީ މާ ބޮޑުކަމެއް ނޫން ކަމަށް ދޭހަވާ މޭރުމަކުން ބާރަށު ދާއިރާގެ މެމްބަރު އިބްރާހިމު ޝުޖާއު ދެއްކެވި ވާހަކަތަކަށް ރައީސް އަބްދުﷲ ޔާމީން ރައްދު ދެއްވައިފިއެވެ.

ޕީއެންއެފުން އާދިއްތަ ދުވަހުގެރޭ ބޭއްވި ޖަލްސާގައި ވާހަކަފުޅު ދައްކަވަމުން ރައީސް ޔާމީން ވިދާޅުވީ، ޑީެނއާރުގައި ހުންނަނީ ދައުލަތުގެ އެސެޓެއް ނޫން ކަމަށާ އެއީ ދިވެހި ފަރުދުންގެ ޒާތީ ކަމަށާ އެ ބަލަހައްޓާ ބަޔަކީ ޑީއެންއާރުގެ މުވައްޒަފުން ކަމަށެވެ. ނަމަވެސް އެއީ ސަރުކާރުގެ އެއްޗެއް ނޫން ކަމަށް ތަކުރާރުކޮށް ވިދާޅުވެ ރައީސް ޔާމީން ވަނީ، ކޮންމެ ސަރުކާރަކުން އެދުނަސް ޑީއެއާރުން މައުލޫމާތު ދޭނެ ކަމަށް ޝުޖާއު ބުނި ބުނުމަށް ރައްދު ދެއްވާފައެވެ.

އެގޮތުން ރައީސް ޔާމީން ވިދާޅުވީ، މައްސަލައަކަށް ވެގެން އުޅެނީ ޑީއެންއާރުން ސަރުކާރަށް މުހިއްމު ކަމެއްގައި މައުލޫމާތު ފޯރުކޮށްދީގެން ނޫން ކަމަށާ މައްސަލައަކަށް ވެގެން އުޅެނީ ސިޔާސީ ޕާޓީތަކުގެ ތެރެއިން ވަކި ޕާޓީއަކަށް ޑީއެންއާރުން ވައްކަންކޮށްދިގެން އުޅޭ އުޅުން ކަމަށާ އެހެންކަމުން ކަމުގެ ހަގީގަތް އޮޅުވާނުލުމަށް ރައީސް ޔާމީން ވަނީ ޝުޖާއުއަށް ގޮވާލާފައެވެ.

ރައީސް ޔާމީން ވިދާޅުވީ ޑީއެންއާރުން ވައްކަން ކުުރުމަށްފަހު ޕީއެންސީއަށް ނިސްބަތްވާ ބައެއް މަޖިލިސް މެމްބަރުން އެކަމުގެ ދިފާއުގައި ދައްކަނީ ވަރަށް ޣައިރު ޒިންމާދާރު ވާހަކަ ތަކެއް ކަމަށެވެ.