ފިނޭންސް މިނިސްޓްރީން ނެރޭ ވީކްލީ ފިސްކަލް ޑިވެލޮޕްމަންޓްސް ރިޕޯޓް ނެރުން އަނެއްކާވެސް ލަސްވެއްޖެއެވެ.
ވީކްލީ ފިސްކަލް ޑިވެލޮޕްމަންޓްސް ރިޕޯޓުން ސަރުކާރުގެ މާލިއްޔަތުގެ ޚުލާސާއާއި، ހަރަދާއި އާމްދަނީގެ ތަފްސީލީ ނަތީޖާއާއި، ރިޕޯޓިންގ ހަފްތާއަށް ސަރުކާރުން ނަގާފައިވާ ލޯނުތަކުގެ ތަފްސީލް ފޯރުކޮށްދެއެވެ. މި ރިޕޯޓު ނެރެނީ ކޮންމެ އަންގާރަ ދުވަހަކުއެވެ.
ފާހަގަކޮށްލެވޭ ގޮތުގައި އެންމެ ފަހުން ނެރުނު ވީކްލީ ފިސްކަލް ޑިވަލޮޕްމަންޓްސް ރިޕޯޓު ނެރިފައިވަނީ މި އަހަރު ޖެނުއަރީ 16 އާއި ހަމައަށެވެ.
މި އަހަރު އެކަމާއި ގުޅުން ހުރި ރިޕޯޓުތައްވެސް ނެރުނީ 13އޮންލައިނުން އެކަމާއި ސުވާލު ކުރުމުންނެވެ. އެގޮތުން މިއަދާއި ހަމައަށް ނުނެރި އަދި 2 ރިޕޯޓު އޮތްކަންވެސް ފާހަގަކޮށްލެވެއެވެ.
މި ކަމާއި ގުޅިގެން 13 އޮންލައިނުން ފިނޭންސް މިނިސްޓްރީއަށް މައުލޫމާތު ސާފުކޮށްލުމަށް ގުޅުމުން އެ ރިޕޯޓު ކޮމްޕައިލު ކުރުމުގެ މަސައްކަތް މިނިސްޓްރީގެ ފިސްކަލް އެފެއާޒް ޑިޕާޓްމަންޓުން ކުރިއަށްދާކަމަށްވަނީ މައުލޫމާތު ދީފައެވެ. އަދި އެ ކޮމްޕައިލް ކުރެވޭހޭ އަވަހަށް އަޕްލޯޑު ކުރެވޭނެ ވާހަކަވެސްވަނީ ބުނެފައެވެ. އެގޮތުން މިއަދުގެ ނިޔަލަށް މިދިޔަ ހަފްތާގެ ރިޕޯޓު ޝާއިރު ކުރާނެ ވާހަކަވަނީ ބުނެފައެވެ.
