

މިދިޔަ މަހެއްހާ ދުވަހުގެ ތެރޭގައި ދައުލަތަށް ވަތް އާމްދަނީގެ އަދަދު ދަށްވެއްޖެ އެވެ.
މިދިޔަ ބުރާސްފަތި ދުވަހު ފިނޭންސް މިނިސްޓްރީން ވަނީ މި މަހުގެ ހަވަނަ ދުވަހުގެ ނިޔަލަށް ދައުލަތަށް ލިބިފައިވާ އާމްދަނީއާއި ކޮށްފައިވާ ހަރަދުތަކުގެ ތަފުސީލު ހާމަކޮށްފަ އެވެ.
ފިނޭންސް މިނިސްޓްރީގެ ތަފާސްހިސާބުތަކުން ދައްކާ ގޮތުން، މި މަހުގެ ހަ ވަނަ ދުވަހުގެ ނިޔަލަށް ދައުލަތަށް ޖުމްލަ އާމްދަނީގެ ގޮތުގައި 3.7 ބިލިއަން ރުފިޔާ ލިބުނެވެ. މިދިޔަ އަހަރުގެ މި މުއްދަތުގައި ދައުލަތަށް ލިބުނީ 4.6 ބިލިއަން ރުފިޔާ އެވެ. އެހެންވެ އެއީ 874 މިލިއަން ރުފިޔާގެ ދަށްވުމެކެވެ.
ދައުލަތަށް ވަތް އާމްދަނީގެ އަދަދު މަދުވިއިރު އިގުތިސޯދީ ކުރިއެރުމާއި ދަރަނީގެ ދެމެހެއްޓެނިވިކަން ކަށަވަރުކުރަން, ހަރަދު ކުޑަކުރަން އަޅަން ރާވާފައިވާ ފިޔަވަޅުތައް ލަސްނުކޮށް ވީހާ ވެސް އަަވަހަށް އެ ފިޔަވަޅުތައް ތަންފީޒުކުރަން އިންޓަނޭޝަނަލް މަނިޓަރީ ފަންޑު (އައިއެމްއެފް) އިން ވަނީ ސަރުކާރަށް މިފަހުން ގޮވާލައިފަ އެވެ.
ރާއްޖޭގެ ދަރަނި ޖީޑީޕީގެ ނިސްބަތުން 120 ޕަސެންޓުގައި ހުރިއިރު, މި މައްސަލަ ހައްލުކޮށް ދަރަނީގެ ދެމެހެއްޓެނިކަން ކަށަވަރުކުރަން ގިނަ މަސައްކަތްތަކެއް ކުރަން ޖެހޭ ކަމަށް ވެސް އައިއެމްއެފްގެ ވަފުދުގެ ބޭފުޅުން ފާހަގަކުރި އެވެ.
ޓެކްސްގެ އާމްދަނީގެ ތެރެއިން އެންމެ ބޮޑު އަދަދެއް ދަށްވެފައިވަނީ އިމްޕޯޓު ޑިއުޓީ އާއި ވިޔަފާރި ފައިދާއިން ލިބޭ ޓެކްސް އިންނެވެ. އިމްޕޯޓު ޑިއުޓީ ވަނީ 64 ޕަސެންޓު ދަށްވެފަ އެވެ. މި އަހަރުގެ މިހާތަނަށް އިމްޕޯޓު ޑިއުޓީގެ ގޮތުގައި 138 މިލިއަން ރުފިޔާ ލިބުނު އިރު މިދިޔަ އަހަރު އިމްޕޯޓު ޑިއުޓީގެ ގޮތުގައި 384 ބިލިއަން ރުފިޔާ ލިބިފައިވެ އެވެ. އެއީ 247 މިލިއަން ރުފިޔާގެ ވެއްޓުމެކެވެ.
އިމްޕޯޓު ޑިއުޓީ އެހާ ބޮޑަށް ދަށްވެފައިވާ އިރު މި އަހަރުގެ ޖެނުއަރީ މަހުން ފެށިގެން ޗައިނާއިން އެތެރެ ކުރާ ގިނަ ބާވަތްތަކަށް ޑިއުޓީ ނެގުން ވަނީ ހުއްޓާލައިފަ އެވެ.
ފިނޭންސްގެ ތަފާސްހިސާބުތައް ދައްކާ ގޮތުން މުވައްޒަފުންގެ މުސާރަ އާއި އިނާޔަތްތައް އަދި ޕެންޝަނަށް މިދިޔަ އަހަރުގެ މި މުއްދަތުގައި އެއް ބިލިއަން ރުފިޔާ ހޭދަކުރިއިރު އިދާރީ އަދި ހިންގުމުގެ ހަރަދު ހުރީ 1.8 ބިލިއަން ރުފިޔާއަށްވުރެ މަތީގަ އެވެ.
ކެޕިޓަލް ހަރަދު މި އަހަރު ހުރީ 102.5 މިލިއަން ރުފިޔާގަ އެވެ. މި އަދަދު މިދިޔަ އަހަރުގެ މި މުއްދަތުގައި ހުރީ 787.6 މިލިއަން ރުފިޔާގަ އެވެ.
ޓެކްސް ނޫން އާމްދަނީއަށް ބަލާއިރު، އެއާޕޯޓް ޑިވެލޮޕްމެންޓް ފީ (އޭޑީއެފް)އަށް މި އަހަރު ލިބިފައިވަނީ 109 މިލިއަން ރުފިޔާއެވެ. ދެހާސް ސައުވީހުގެ މި މުއްދަތުގައި އޭޑީއެފްގެ ގޮތުގައި 119 މިލިއަން ރުފިޔާ ލިބިފައިވެއެވެ.
ޕްރޮޕަޓީ އިންކަމް ވެސް ދަށްވެފައިވާއިރު އޭގެ ތެރެއިން، ރިޒޯޓުތަކުން ކުލީގެ ގޮތުގައި މިދިޔަ އަހަރުގެ އެ މުއްދަތުގައި 93.7 މިލިއަން ރުފިޔާ ލިބިފައިވާއިރު މި އަހަރު ލިބުނީ 65.9 މިލިއަން ރުފިޔާއެވެ. އެއީ 29.7 ޕަސެންޓު ދަށް އަދަދެކެވެ.
ދައުލަތަށް މި މުއްދަތުގައި އާމްދަނީގެ ގޮތުގައި ލިބުނީ 3.7 ބިލިއަން ރުފިޔާގެ އެވެ. މީގެ ތެރޭގައި ޓެކްސް އާމްދަނީގެ ގޮތުގައި ލިބުނު 3.3 ބިލިއަން ރުފިޔާ އާއި ޓެކްސް ނޫން އާމްދަނީގެ ގޮތުގައި ލިބުނު 393.5 މިލިއަން ރުފިޔާ ހިމެނެ އެވެ.
ރާއްޖޭގެ މާލީ އަދި އިގުތިސާދީ ހާލަތާ ގުޅިގެން، ހަރަދުތައް ކުޑަކުރަން ދައުލަތުގެ މި އަހަރުގެ ބަޖެޓުގައި ހިމެނި އެއްވެސް ފިޔަވަޅެއް ތަންފީޒު ކުރަން އެއްވެސް ކަމެއް ނުކުރާ ކަމަށާއި އެއްވެސް ޕްލޭނެއް ނެތި ހަރަދުތައް ވެސް އިތުރުވެފައިވާ ކަމަށް އިދިކޮޅުން އަންނަނީ ބުނަމުން ނެވެ.
މިދިޔަ އަހަރު ރާއްޖޭގެ އުފެއްދުންތެރިކަން ހުރީ 109 ބިލިއަން ރުފިޔާގަ އެވެ. އަދި އިގްތިސާދު ކުރި އެރީ 5.5 ޕަސެންޓުގަ އެވެ. އަދި މިއަހަރު ރާއްޖޭގެ އިގްތިސާދު ކުރި އަރާނެ ކަމަށް އެމްއެމްއޭ އިން ލަފާކޮށްފައިވަނީ 6.4 ޕަސެންޓުގަ އެވެ.