2 ރ ނޫޓުގައި ރައީސް މުއިއްޒު އިންޑިއާ އައުޓް ޓީޝާޓް ތުރުކުރެއްވި ފޮޓޯ ޖަހަން ރަނގަޅު ކަމަށް ޕީއެންއެފްގެ އިސް ސަފުގައި ހަރަކާތެރިވާ މުހައްމަދު އަހުމަދު ވަހީދު (ވައްޑެ) ވަނީ ވިދާޅުވެއްޖެ އެވެ.

ދުނިޔޭގެ އެންމެ ރީތި ބޭންކް ނޫޓްތަކުގެ ތެރޭގައި ހިމެނޭ ދިވެހި 1000 ރުފިޔާގެ ނޫޓްގައި ރައީސް ޑރ. މުހައްމަދު މުއިއްޒުގެ ފޮޓޯ ޖަހަން މަޝްވަރާކުރަން ފަށައިފި ކަމުގެ ހަބަރުތަކެއް މިފަހުން ވަނީ ދައުރުވާން ފަށައިފަ އެވެ.

މިކަން ލީކުކޮށްލީ ޓްވިޓާގައި ކާކުކަން ނޭނގޭ ގޮތަށް ސަރުކާރަށް ފާޑުކިޔައި އެކި މައުލޫމާތުތައް ހާމަކުރަމުންދާ "ހަސަން ކުރުސީ"ގެ އެކައުންޓުންނެވެ.

ހަސަން ކުރުސީގެ އެކައުންޓުން ބުނީ މަރުކަޒީ ބޭންކް، އެމްއެމްއޭގެ ގަވަރުނަރު އަހުމަދު މުނައްވަރު އޭނާގެ ބައެއް ސްޓާފުންނާއިއެކު ދިވެހި 1000 ރުފިޔާގެ ނޫޓްގައި ރައީސް ޑރ. މުއިއްޒުގެ ފޮޓޯ ޖެހުމަށް މަޝްވަރާ ކުރަމުން އަންނަ ކަމަށެވެ.

މިކަމާއި ގުޅިގެން "އެކްސް" ގައި ކުރެއްވި ޕޯސްޓެއްގައި ވައްޑެ ވިދާޅުވީ ދިވެހި 1000 ރުފިޔާގެ ނޫޓްގައި ރައީސް ޑރ. މުއިއްޒުގެ ފޮޓޯ ޖެހުން ހައްގު ނޫންކަމަށެވެ.

ދިވެހި ރުފިޔާގެ 1،000ރ. ގެ ނޫޓުގެ އެއްފުށުގައި އިންނަނީ ފެހުރިހީގެ ކުރެހުމެކެވެ. އަދި އަނެއްފުށުގައި އިންނަނީ ވެލައެކެވެ. ޕޮލިމާގައި ޕްރިންޓުކޮށްފައި ހުންނަ މި ނޫޓުގައި ބޭނުންކޮށްފައި ވަނީ ނޫ ކުލައިގެ އެކި ޝޭޑުތަކެވެ.

ރާއްޖޭގައި ކަރުދާސް ނޫޓް ބޭނުންކުރުން ހުއްޓާލައި "ރަންދިހަފަހެއް" ސީރީޒްގެ ޕޮލިމާ ނޫޓުތައް ބޭނުންކުރަން ފެށީ ރައީސް ޔާމީނުގެ ވެރިކަމުގައި 2015 ގަ އެވެ. އެ އާ ނޫޓް ސީރީޒްގައި ހިމެނެނީ 5، 10، 20، 50، 100، 500 އަދި 1،000 ރުފިޔާގެ ނޫޓްތަކެވެ.

ދުނިޔޭގެ އެންމެ ރީތި ބޭންކް ނޫޓްތަކުގެ ތެރޭގައި ހިމެނޭ ދިވެހި 1000 ރުފިޔާގެ ނޫޓްގައި ރައީސް ޑރ. މުހައްމަދު މުއިއްޒުގެ ފޮޓޯ ޖަހަން އެމްއެމްއޭގެ ގަވަރުނަރު އުޅުއްވާތީ ގިނަބައްގެ ފާޑުކިޔުން ރައީސް މުއިއްޒު އަށާއި އެމަނިކުފާނުގެ ސަރުކާރަށް އަދި އެމްއެމްއޭ އަށް ވަނީ އަމާޒުވެފަ އެވެ.