އަދި އެއްވެސް ހިދުމަތް ދޭން ނުފެށި ނަމަވެސް ޑިވެލޮޕްމެންޓް ބޭންކަށް މާޗު މަހުގެ ނިޔަލަށް 6.5 މިލިއަން ރުފިޔާ ހަރަދުކޮށްފިކަން ހާމަވެއްޖެއެވެ.
މިކަން ހާމަވެފައިވަނީ މައުލޫމާތު ހޯދާ ލިބިގަތުމުގެ ގާނޫނުގެ ދަށުން ގާނޫނީ ވަކީލު އަޙުމަދު މައުރޫފް, ހުށަހެޅި އާރުޓީއައިއަކަށް ފިނޭންސް މިނިސްޓްރީން ދިން ޖަވާބުންނެވެ. އެގޮތުން އެ ބޭންކް އުފައްދަން ފެށީއްސުރެ، މިދިޔަ މާޗް މަހުގެ 25 ގެ ނިޔަލަށް, އެކަމާ ގުޅޭއެކިއެކި ކަންކަމަށް ފިނޭންސް މިނިސްޓްރީން 6.5 މިލިއަން ރުފިޔާ ހޭދަ ކޮށްފައިވާކަމަށް ފިނޭންސުން ހާމަކޮށްފައިވެއެވެ. ނަމަވެސް ހަރަދުތައް ކުރިގޮތުގެ ތަފްސީލެއް ފިނޭންސްއިން ހާމަ ކޮށްފައެއް ނުވެއެވެ.
މިދިޔަ މާޗު 25، ގެ ނިޔަލަށް 6،566،338ރ. 20ލ. ޑީބީއެމްއަށް ހަރަދުކޮށްފައިވާއިރު، އެއީ ކޮން ކަންކަމަކަށް ހަރަދު ކޮށްފައިވާ ފައިސާކަން ޖަވާބުގައި ބަޔާން ކޮށްފައިވެއެވެ. ތަފްސީލުގެ ގޮތުގައި ހާމަކޮށްފައިވަނީ،
ދެމެހެއްޓެނިވި އިގްތިސާދީ އަދި އިޖުތިމާއީ ތަރައްގީއަށް އިންވެސްޓުކުރުމާއި އުމްރާނީ ތަރައްގީއަށް ބޭނުންވާ ފައިސާ ހޯދުމުގެ އަމާޒުގައި މި ސަރުކާރުން އުފެއްދި ޑިވެލޮޕްމެންޓް ބޭންކު ހުޅުވީ މިދިޔަ ނޮވެމްބަރު 16، ގައި ރައީސް ޑރ، މުހައްމަދު މުއިއްޒު އެވެ. މި ސަރުކާރުގެ ފުރަތަމަ އެއް އަހަރުދުވަހުގެ ކާމިޔާބީތަކުގެ ތެރޭގައި ވެސް އެކަން ފާހަގަކުރި ނަމަވެސް މިއަދާ ހަމައަށް ވެސް އެތަނުން އެއްވެސް ހިދުމަތެއް ދޭން ފަށައިފައެއް ނުވެ އެވެ. އަދި ކަން އެހެން އޮއްވާ ބޭންކުގެ ސީއީއޯގެ މަގާމުގައި ހުންނެވި ނޮއެލް ގްރެގާ ޕެޓަސަން-ޖޯންސް ވަނީ އިސްތިއުފާވެސް ދީފައެވެ. ސީއީއޯ އިސްތިއުފާ ދެއްވިތާ މާ ގިނަ ދުވަސްތަކެއް ނުވެ މިދިޔަ މަހުގެ 23 ވަނަ ދުވަހު ވަނީ, އެ ބޭންކުގެ ބޯޑު މެންބަރު ކަމުގެ މަގާމުގައި ހުންނެވި މއ. ވޭސައިޑް, 805 ފްލެޓް، އަޙްމަދު ޢަލީ، ވެސް އިސްތިއުފާ ދެއްވައިފައެވެ.
ރާއްޖޭގައި ފުރަތަމަ ފަހަރަށް ހުޅުވި ޑިވެލޮޕްމަންޓް ބޭންކްގެ ޚިދުމަތް ނުފެށި ލަސްވާތީ ވެސް ބައެއް ފަރާތްތަކުން ކަންބޮޑުވުން ފާޅުކޮށްފައިވެއެވެ. އެކަމަކު، އެ ބޭންކްގެ މަސައްކަތް ތާވަލާ އެއްގޮތަށް ކުރިއަށްދާ ކަމަށް އިކޮނޮމިކް މިނިސްޓަރު މުހައްމަދު ސައީދު މީގެ ކުރިން ވަނީ ވިދާޅުވެފައެވެ.
