2024 ވަނަ އަހަރުގެ ބަޖެޓުގައިވާ ގޮތަށް ހަރަދުތައް ހަމަޖައްސައި އިތުރަށް ހަރަދުތައް ކުޑަ ކުރުމަށް ފިނޭންސް މިނިސްޓްރީން ހަރުކަށި ފިޔަވަޅުތަކެއް އަޅަން ނިންމައިފި އެވެ.

މިކަމާ ގުޅިގެން ފިނޭންސް މިނިސްޓްރީ އިން ސާކިއުލާއެއް އާންމު ކޮށްފައިވާއިރު އެ ސާކިއުލާގައި، އެ މިނިސްޓްރީ އިން ބުނެފައިވަނީ ސަރުކާރުގެ އިދާރާއަކުން އާ މުވައްޒަފެއް ނަގާ ނަމަ އެކަން މިނިސްޓްރީއަށް ދުރާލާ އަންގަން ޖެހޭނެ ކަމަށާއި އަދި އެކަން ކުރިއަށް ގެންދެވޭނީ މިނިސްޓްރީން ހުއްދަ ދިނުމުން ކަމަށެވެ.

އަދި މުވައްޒަފުންގެ މުސާރައަށް ބަދަލު ނުގެނައުމަށާއި މިއަހަރުގެ ބަޖެޓުގައި ހިމަނާފައި ވީ ނަމަވެސް އިތުރު އާ އެލަވަންސެއް ނުދިނުމަށާއި އަދި މުވައްޒަފުންނަށް ޕްރޮމޯޝަން ދިނުމާއި މުސާރަ އާއި އިނާޔަތްތަކަށް ބަދަލު ނުގެނައުމަށް ފިނޭންސް މިނިސްޓްރީ އިން ވަނީ ސަރުކާރުގެ އިދާރާތަކަށް އަންގާފައިވެއެވެ.

އޭގެ އިތުރުން ރަސްމީ ގަޑި ފިޔަވައި އިތުރު ގަޑީގައި ކޮންމެހެން ކުރަން ޖެހޭ މަސައްކަތް ފިޔަވައި އިތުރު މަސައްކަތެއް ނުކުރަން އެ މިނިސްޓްރީ އިން ވަނީ އެދިފައެވެ.

މީގެ އިތުރުން އެ ސާކިއުލާގައި ވަނީ ރާއްޖެއިން ބޭރަށް ރަސްމީ ދަތުރެއް ކުރާ ނަމަ ފިނޭންސް މިނިސްޓްރީގެ ހުއްދަ ހޯދުމަށާއި އަދި އަލަށް އިތުރު ސްކޮލާޝިޕެއް ނުދިނުމަށް ވެސް އެދިފައިވެއެވެ. އަދި މިހާތަނަށް ހުއްދަދީފައިވާ ކަންކަން ފިޔަވައި އިތުރު ތަނެއްގެ މަރާމާތަށް ރިކަރަންޓް ބަޖެޓުން ހަރަދު ނުކުރުން ވެސް ހިމެނެއެވެ.

ރައީސް ޑރ. މުއިއްޒު މީގެ ކުރިން ވިދާޅުވީ ހަރަދުތައް ކުޑަކުރައްވާނެކަމަށެވެ. ނަމަވެސް ކުރީ ސަރުކާރެކޭ އެއްފަދައިން މި ސަރުކާރުން ވެސް އަންނަނީ ބޮޑެތި ބޭކާރު ހަރަދުކުރަމުން ކަމަށް ގިނަ ފަރާތްތަކުން ބުނެއެވެ.