ބޮޑެތި ޒަހަމްތަކަކާ އެކު ނ. ހޮޅުދޫގައި ނިޔާވެފައި އޮއްވާ ފެނުނު ޒަކިއްޔާ މޫސާ މަނިކުގެ މަރަށް އެއް އަހަރު ފާއިތުވެގެން ދާއިރު އަދިވެސް އެކަމުގައި އިންސާފު ނުލިބިވާތީ ސަރުކާރު ޖަވާބުދާރީ ކުރުވަން އަނެއްކާވެސް ނިކުންނަން އެ ރަށުގެ ރައްޔިތުން ނިންމައިފިއެވެ.

މިކަމާ ގުޅިގެން ރަށުގައި އިސްކޮށް ހަރަކާތްތެރިވާ ޒުވާނަކު ތޭރަ އޮންލައިންއަށް މައުލޫމާތު ދީފައިވާ ގޮތުގައި، ސަރުކާރުން ޒަކިއްޔާގެ މައްސަލައިގައި ހަދަމުން ގެންދަނީ މޮޅެތި ހެޑްލައިން ކަމަށާ ދެން އެ ހެޑްލައިންތަކަށް ބަލައިގެން މަޑުން ނުތިބޭނެ ކަމަށެވެ.

ފެށުނީއްސުރެ ވެސް ޒަކިއްޔާގެ މައްސަލައިގައި ދައުލަތުގެ ކަމާ ގުޅުން ހުރި އިދާރާތަކުން ގެންދަނީ ހޮޅުދޫ ރައްޔިތުންނަށާ މުޅި ގައުމަށް ވެސް އޮޅުވާލަމުން ކަމަށް ތުހުމަތުކޮށް އެ ޒުވާނާ ހާމަކުރި ގޮތުގައި ސަރުކާރާުގެ ވެރިޔާ އެހާ ގާތް ގުޅުމެއް އޮންނަ ރަށެއްގެ މައްސަލަ އެހާ ގާތުން ބަލާ ނަމަ މައްސަލައަށް މިހާ ދުވަސް ވެގެންދާއިރު މިހާ ދޯދިޔާކޮށް ދަނީ ކީއްވެތޯ ސުވާލުކޮށްލަން ބޭނުން ކަމަށެވެ.

ކުރީގެ ކޮމިޝަނަރ އާ ވަޒީރުވެސް ބަންދު ދޮރުތަކުގެ ތެރޭގައި ރައްޔިތުންނާ ދެއްކި ވާހަކަތަކުގެ ރެކޯޑިން އެބަހުރި ކަމަށަ އެތައް ދޮގެއް އެ ރެކޯޑުތަކުން ހާމަވާނެ ކަމަށް ވެސް އެ ޒުވާނާ ވަނީ ބުނެފައެވެ.

އެހެންކަމުން ދެން ރައްޔިތުން މަޑުން ނުތިބޭނެ ކަމަށާ ރައްޔިތުން ދެން ނުކުންނާނީ ދޭތިން އެކައްޗަށް ކަމަށް ވެސް އެ ޒުވާނާ ވަނީ ބުނެފައެވެ.

ޒަކިއްޔާގެ މަރަށް އަހަރެއް ވާން ގާތްވެފައިވާއިރު، އެންމެ ފަހުން ރައީސް މުހައްމަދު މުއިއްޒު ބޭއްވި ނޫސްވެރިންގެ ބައްދަލުވުމުގައި ވިދާޅުވީ ހޮޅުދޫއަކީ އެމަނިކުފާނާ ގާތް ގުޅުމެއް އޮންނަ ރަށަކަށް ވުމުން އެ ރަށުގައި ހިނގާ ކަންކަން އެމަނިކުފާނަށް ވަރަށް ރަގަޅަށް އެނގިވަޑައިގަންނަވާ ކަމަށާ އެ ރަށުގައި ހިނގާ ދިޔަ އެ ހާދިސާގައި ވެސް ތަފާތު ކުރުމެއް ނުގެންގުޅުއްވާ ކަމަށެވެ. ރައީސް މިފަދައިން ވިދާޅުވި ނަމަވެސް ފުލުހުންގެ އިހުމާލު އެ މައްސަލައިގައި އޮތް ކަމަށް ވަޒީރާ އޭރުގެ ސީޕީ ވެސް ލައިވް ޓީވީގައި އިއުތިރާފުވެފައިވާއިރުވެސް، އެ ތަހުގީގުން ފުލުހުން އެއްކިބާކޮށް ކޮމިޝަނެއް ހެދުމުގެ ވިސްނުންފުލެއްވެސް ރައީސް ނުގެންގުޅުއްވައެވެ. ނަމަވެސް ދާދި ަފހުން ޟާލޭގައި ޒުވާނަކު ފުރާެއްގެ މައްޗަށް ވެއްޓި ހިނގި ހާދިސާގައި މާލޭގެ މަގުތަކުގައި ޒުވާނުން ކުރި މުޒާހަރާތަކާ އެކު ސަރުކާރު ޕްރެޝަރަށް ވެއްޓި އެ ތަހުގީގުކުރަން ކޮމިޝަނެއް އެކުލަވާލާ ބާރު ސްޕީޑުގައި މައްސަލަ ބަލާ ވަނީ ނިންމާފައެވެ.

ހޮޅުދު ރައްޔިތުން ސިފަކުރަނީ އެއީ ވެސް ބޮޑު ތަފާތުކުރުމެއްގެ ގޮތުގައެވެ.